Charla Informativo di Directie Ouderenzaken tabata un exito total

Minister Ursell Arends:

ORANJESTAD (AAN): Diaranson 2 november ultimo a tuma luga e di 4 charla informativo di Directie Ouderenzaken, Centraal Bureau Statistiek Aruba (CBS) y Ministerio di Adulto Mayor unda a elabora riba demencia y malesa cronico na Aruba.

            Como panelista tabata t’ey presente Sra. Desiree Helder di CBS, Sra. Kimberly Hoo di Trinity Quality Care Services y Sra. Lisette Does di Stichting Cas Marie unda a duna splicacion amplio riba e tema di demencia cu a tuma luga na Centro di Bario Playa Pabou.

            E charlanan informativo aki a wordo organisa durante henter luna di adulto mayor pa trece concientisacion y encurasha participacion activo riba diferente tema relevante pa adulto mayor entre otro e situacion financiero di adulto mayor, adulto mayor femenino y necesidad di cuido.

            Durante charlanan a duna esnan presente e oportunidad pa hasi pregunta, comparti nan preocupacionnan y conta di nan experiencia como adulto mayor. Pa esnan cu no a logra di atende e charlanan, por wak e videonan cu ta disponibel riba e pagina di Facebook di Directie Ouderenzaken.

            Minister di Asuntonan di Adulto Mayor, Sr. Ursell Arends ta sumamente contento cu e interes y participacion di nos adultonan mayor durante e charlanan unda a trece puntonan valido cu ta aporta na e maneho pa nos adultonan mayor.  

            Minister Arends ta manda palabra di gradicimento na tur panelistanan como tambe moderador Edward Erasmus pa haci e charlanan aki un exito y brinda informacion valioso pa nos adultonan mayor. Alabes un palabra di danki na tur centro di bario, fundacion y gruponan di bario cu a colabora y habri porta pa actividadnan durante luna di adulto mayor.