Ceremonia di reconocimento pa pensionadonan di Cuerpo di Bombero

ORANJESTAD (AAN): Diamars atardi a tuma lugar un ceremonia di reconocimento pa e pensionadonan di Brandweer.

Durante e ceremonia minister di Husticia Rocco Tjon a cuminza na pidi despensa y bisa danki na e pensionadonan di Brandweer.

“Nunca ta mucho laat pa pidi despensa y nunca ta mucho laat pa gradici boso pa tur boso añanan di dedicacion y tur boso añanan di servicio”.

Mi a compronde for di sindicato SINBA y e management team cu pa hopi aña diferente di boso a bandona e cuerpo importante aki pa pais Aruba y cu nunca boso a haya un reconocimento, segun Tjon.

El a bisa cu e ta spera cu e ceremonia por haci esey un tiki mas mihor.

Segun e mandatario, den un combersacion un pensionado a conta cu despues di a bandona cuerpo di bomber e no tin ni un carta pa e por mustra por ehempel su nietonan cu el a traha asina hopi aña pa Brandweer.

Tjon a splica cu asina tin mas storia y pesey ora cu el a haya e peticion di parti di SINBA y e management team pa organiza e ceremonia aki, e contesta tabata si.

“Nos como mandatario y lider di organizacion ta enfoca riba e parti di material, e parti di infrastructura y por ehempel e parti di trucknan, pero hopi biaha nos ta lubida e parti mas importante, e recursonan mas valioso, esta e recursonan humano”, segun e mandatario.

Tjon a finaliza door di bisa cu di awor pa dilanti hunto cu e sindicato y management team, lo percura pa esnan di cuerpo di bomber cu bay cu pensioen, no bay sin haya e reconocimento bon mereci.