CEO di Aeropuerto no ta kere cu e avion daña siman pasa ta forma un estorbo pa plataforma

ORANJESTAD (AAN): Manera ta conoci, Diabierna siman pasa un incidente a socede riba plataforma dilanti Aeropuerto di Aviacion General (Terminal banda pazuid),

ora e wiel di un avion Gulfstream Aerospace G-1159A a collapse, kedando eynan sin cu e por move, y pa colmo a causa destruccion riba e plataforma tambe.

   For di e atardi ey e avion cu tin 2 motor di jet y cu 21 asiento abordo a keda stagna eynan.  E ta pertenece na un compania cu sede na Delaware na Merca.

   Su presencia eynan ta un estorbo pa aviacion general of no.  Diaranson atardi durante un conferencia na Aeropuerto, prensa a haya chens di puntra e CEO di AAA NV, esta Joost Meijs si acaso ta bay acelera e proceso pa kita e avion eynan of ta lage keda te ora cu e landing gear por wordo drecha.

   Meijs a mustra cu for di punto di bista operacional, e Gulfstream aki no ta un estorbo pues no ta ‘den caminda’.  Pues otro avionnan por maniobra y pasa rond di dje, aunke en realidad e no merece keda staciona eynan.

   El a confirma cu AAA NV ta den comunicacion cu e doño di e avion priva aki relaciona cu e daño causa na e plataforma, y tambe pa check con rapido e por wordo drecha y hala di eynan.

   Pero riba tur esaki tin di bay check e asunto di ‘liability’, pues Aeropuerto mes no pro yega cu vehiculo special pa kita e avion di eynan.  Fuera di esey, Aeropuerto mes no tin e equipo aki disponible.

   E avion ainda ta ‘di banda’ staciona, y pa bo hise bo mester di equipo special pa esey.  Pero pa awor, Aeropuerto di Aruba no ta poniendo ningun tipo di presion pa e doño bay hala e avion di eynan lo mas rapido posible.