Centro di Bario Dakota ta inaugura ‘Sala Hunto pa Futuro PC Lab and Workspace’

Glennrick Ridderstap:

* Tin Intencion di introduci un programa di huiswerkbegeleiding 

ORANJESTAD (AAN) – Siman pasa, Centro di Bario Dakota a celebra e soft opening di ‘Sala Hunto pa Futuro PC Lab and Workspace’, un espacio crea pa brinda sosten y oportunidadnan educacional na muchanan y hobennan, specialmente esnan di bario Dakota.

Glennrick Ridderstap, miembro di directiva, a enfatisa cu e sala nobo lo fortalece e rol educativo di Centro di Bario Dakota, cu ta considera educacion como un di su prioridadnan principal. E espacio ta ekipa cu 12 computer, cu ta disponibel pa muchanan cu no tin acceso na computer na cas, permitiendo nan haci trabounan escolar, investigacion y otro actividadnan relaciona cu scol.

Ademas di acceso na tecnologia, e centro tin intencion di introduci un programa di huiswerkbegeleiding na inicio di e proximo aña escolar. E iniciativa aki ta brinda apoyo adicional na studiantenan den nan proceso di estudio.

Ridderstap a agrega cu e centro ta ofrece tambe acceso na varios actividad recreativo y di desaroyo personal, incluyendo baile, schaken, basketball, futbol y asambeho. Segun e, tin varios otro proyecto den preparacion cu lo sigui amplia e posibilidadnan pa hobennan y comunidad di Dakota.

Cu e apertura di’ Sala Hunto pa Futuro PC Lab and Workspace’, Centro di Bario Dakota ta duna mas oportunidad na mucha y hobennan y ta reenforsa su compromiso cu desaroyo educativo y social di e generacion hoben.