CEDEHM a organiza interesante simposio tocante violencia cu stalking y crimen cibernetico

Trahado Social Jeanine Tromp, a splica:

ORANJESTAD (AAN) Jeanine Tromp, Trahado Social di Centro de Desaroyo di Hende Muher (CEDEHM), den un entrevista cu Matutino DIARIO a bisa cu e organizacion aki ta forma parti di “Orange the World” cu ta e instancia internacional, activo den e lucha contra violencia di hende muher.

   Den e contexto aki CEDEHM a organiza un simposio  titula “Lucha di hende muher contra Violencia Digital, Online Stalking, y Cyber Crime” cu ta existi.

   “Asina CEDEHM a bin awe cu un simposio cu ta pa profesionalnan na veld, specialmente tur e trahadornan cu ta haya nan mes cu e problema aki”, Jeanine a comenta. Nos a presenta tres video cu ta expone diferente caso cu tin di haber cu cyber crime, stoking, violencia online, y tambe nos tin un panel di cinco persona experto cualnan ta bay papia tocante e topiconan aki, y kico nan ta haci cu e comunidad”, Jeanine a señala.

   El a reitera cu e simposio aki a wordo organiza den  cuadro di e celebracion di Dia Internacional contra Violencia di Hende Muher, pasobra e tema di e aña aki ta bay specificamente riba e aspecto online y Cyber Crime.

   “Door di esey CEDEHM a uni su mes y a bin cu e parti aki pa concientiza nos hendenan eyfo, cu esaki no ta algo bon y e por yega na causa hopi crimen cu por sosode”, e Trahado Social a subraya.

   Jeanine a remarca cu nan kier concientiza no solamente hende muher pero tambe hende homber, pa cuida nan mes, pa no expone nan curpa riba potret y ta hopi cauteloso pa no confronta despues cu un situacion cu no mester.

   Tabata tin dialogonan cu CEDEHM a papia riba dje, y pesey den e simposio tabata tin cinco panelista di instancianan relevante, cu ta expertonan den e tema, entre otro KPA, y cu a splica kico ta e importancia y con por yuda nos hendenan muher eyfo, pa proteha nan mes. Pa 2026, CEDEHM ta bay tin hopi mas tema pa concientiza hende muher y tambe hende homber, na Aruba riba diferente tema.