CBS ta ricibi dos auto electrico nobo den cuadro di maneho di Gobierno

Minister Geoffrey Wever:

ORANJESTAD (AAN):  Parti di plan di gobernacion di Gabinete AVP-Futuro ta pa baha gasto di gobierno door di entre otro cambia e fleta di auto cu ta cay bou gobierno. Un trayecto cu ya caba a cuminsa durante gobernacion anterior bou di maneho di Minister Geoffrey Wever cu a bin cu e Plan di Accion Nacional: Aruba su transicion na un modelo economico sostenibel y inclusivo. Parti di e plan di accion nacional tabata ‘Cambio pa Autonan Electrico'.

            Gobierno AVP-Futuro tambe ta continua cu e compromiso aki y awo ta toca turno na Central Bureau Statistiek (CBS,) un otro departamento di gobierno cu ta haci e transicion pa autonan electrico.

            “Mi ta sumamente orguyoso cu awe CBS tambe a cuminsa cu e transicion pa autonan electrico”, Minister Wever a cuminsa ta bisa, “Esaki ta demostra e compromiso cu nos tin cu Aruba como gobierno pa baha gasto operacional.”

            CBS ta e di dos departamento gubernamental cu ta haci e cambio pa autonan electrico.  September ultimo Directie Economishe Zaken (DEZHI) tabata e prome departamento cu a haci e cambio. Pronto SEDECO tambe lo ricibi su autonan electrico. Post Aruba N.V. un entidad estatal  tambe a sigui cu e vision di gobierno y a cuminsa na cambia su fleta pa autonan electrico. Cu esaki Gobierno kier stimula e otro departamentonan di gobierno pero tambe sector priva pa haci e cambio pa autonan electrico y asina contribui na nos medio ambiente.

            N.V. ELMAR a percura pa instala e infrastructura di un EV Charging Station na Sun Plaza como tambe na oficina nobo di SEDECO na playa unda a ubica espacionan necesario caminda autonan electrico por parkeer y recarga nan bateria, y asina facilita e posibilidad pa a busca e autonan electrico.

            DOW a haci un proceso di destaho y asina a scoge Activated Power pa provee e dos autonan electrico, cu tawata tin e miho deal pa Gobierno.

            Minister Geoffrey Wever kier a gradici Elmar, DOW, CBS y Activated Power pa contribui na un Gobierno mas sostenibel y eficiente.  E paso concreto aki ta demostra e compromiso di Gabinete AVP-Futuro pa sigui stimula e transicion energetico di Aruba.