Cas di Cultura ta presenta obra internacional di teatro

ORANJESTAD (AAN): Pa prome biaha, Aruba lo presenta e obra di teatro interactivo y internacional "White Rabbit Red Rabbit" di Nassim Soleimanpour.

E obhetivo di e obra ta celebra teatro en bibo y su resiliencia den temponan insigur.  "White Rabbit Red Rabbit" a worde presenta den teatronan rond di mundo y awo a toca turno di Cas di Cultura pa presenta esaki riba 13 di maart 2022.

Pa motibo di e pandemia, desde maart 2020 mayoria di teatro a cera nan portanan, y cu e evento internacional aki, Cas di Cultura kier reconoce e rol importante di teatro den cultura pa publico y sociedad cu e iniciativa “Laga tin teatro”. Dia 13 di maart di 2022 Aurora Nova; un agencia internacional di reservanan di teatro y un firma di consultoria cu sede na Berlin a ofrece teatronan internacional rond di mundo, incluyendo Cas di Cultura, e permiso pa obra "White Rabbit, Red Rabbit" di Nassim Soleimanpour. Durante 2021, 92 teatro di 33 pais a participa den e iniciativa y presenta e obra riba mesun dia. Cas di Cultura ta hopi honra pa forma parti di e  iniciativa na 2022.

Sin ensayo, sin director, un actor diferente cada anochi y un guion cera den un envelop, e obra aclama internacionalmente “White Rabbit, Red Rabbit” di escritor Irani, Nassim Soleimanpour, ta un experimento teatral. E version di Aruba di White Rabbit, Red Rabbit lo worde interpreta pa Jair 'Buddy' Vesprey, kende a indica cu apesar cu e no tin experiencia den actuacion, e ta hopi excita pa forma parti di e obra aki y ta spera cu comunidad por bin Cas di Cultura y presencia un anochi unico. E obra ya a worde traduci den mas di 30 idioma y a worde representa mas di 1000 biaha pa otro artistanan diferente.