Cas di Cultura ta presenta ' Johnny Scharbaay Jazz Trio'

ORANJESTAD (AAN):  Cas di Cultura tin e grato placer di presenta den e siguiente Music Exposure, Johnny Scharbaay Jazz Trio.

E biaha aki cu un programa hopi special y cerca di Johnny su curason, esta un tributo na a conocido gigante di jazz Chick Corea cu na februari ultimo a fayece, sinembargo lagando un repertorio di musica impresionante atras, manera e conocido jazz standard "Spain".

Johnny Scharbaay a yega di haya les di Chick Corea cu a comparti hopi musica cu'ne. Chick Corea tabata frecuenta Aruba hopi, no solamente dunando concierto desde añanan '80 den entre otro e Aruba Jazz & Latin Music Festival, pero tambe na varios occasion den e auditorio di e barco Freewinds. 

Musiconan profesional, esta Johnny Scharbaay riba piano, Jeremy Bonariba riba drum y Reno Steba riba baho, lo trece un concierto di calidad halto diadomingo 6 di juni pa 4pm na Cas di Cultura.

Apoya e musiconan local cu tur dia ta yuda engrandece e aprecio pa musica y arte y cu haci bida un tiki mas bunita pa medio di musica.