Carnaval 71 ta bay habri den un gran forma

Darren van Ommeren:

ORANJESTAD (AAN): Carnaval 71 ta bay ta un di e Carnavalnan grandi, segun presidente di SMAC Darren van Ommeren.

Den un entrevista el a splica cu Carnaval 71 ta bay habri den un gran forma.

“Manera cu Carnaval a caba nos a bin ta prepara pa esaki y traha riba mehoracionnan di algun di e actividadnan”.

E intencion ta bay haci cosnan diferente y mira kico nos por haci mihor, segun e presidente di SMAC.

Van Ommeren a sigui bisa cu mirando e cantidad di preparacion cu a wordo haci, Carnaval 71 sigur ta bay ta un di e Carnavalnan grandi.

“Despues di celebra un aña grandi manera 70 normalmente e siguiente Carnaval ta bira mas chikito, pero e biaha aki esey practicamente no ta bay ta e caso”, segun van Ommeren.

El a indica cu pa loke ta e gruponan y bandanan, el a tende cu un grupo cu ya caba a duna di conoce cu nan lo no participa ta Infinity Carnaval Group.

Van Ommeren a indica si cu parti di un grupo cu tabata participa cu Infinity a ta bay bin cu un grupo di turista y cu e banda SUONA.

E presidente di SMAC a duna di conoce cu e cantidad di grupo cu lo participa na Carnaval 71 ta practicamente mesun cantidad cu a participa na Carnaval 70.