Caribe lo bay tin ainda 3 luna mas di calor intenso hopi humedo

ORANJESTAD (AAN): Siman pasa, e foro cu sede na Barbados, esta ‘Caribbean Climate Outlook Forum’ conoci como CariCOF,

a indica cu temperaturanan friando cerca di equator di Oceano Pacifico, posiblemente lo por trece un transicion progresivo pa La Niña, mientras cu temperaturanan casi cerca di kibra record riba Oceano Atlantico lo bay sigui.

   Esey nifica cu un piek intenso y e final di e temporada di Horcan di 2024, e temporada humedo di Caribe, y e temporada di calor di Caribe, lo implica episodionan frecuente y intenso di calor humedo opresivo, cu ciclonnan tropical, y mal tempo, cu lo trece chens grandi di inundacion, inundacion repentino, y peligronan estilo caida di domino, y e impactonan cu e ta causa.  Esey ta loke CariCOF a bisa den nan ultimo publicacion di Caribbean Climate Outlooks.

   Den nan pronostico pa periodo di September te cu December, CariCOF a indica cu aunke e condicionnan cu no por wordo pronostica den atmosfera, toch tin biaha ta presenta obstaculonan na e actividad extremo di e tres tipo di temporada aki, y ta poco probabel cu nan lo bay keda persisti den henter e periodo.

   A indica cu den e periodo di Mei te cu Juli di e aña aki, Oceano di Noord-Atlantico mas cayente cu nunca antes, a sigui impulsa temperaturanan record, como tambe awaceronan cu ta mas largo cu e cantidad normal di yobida durante e transision pa e “Regentijd” di Caribe, incluyendo awacero di cantidad record na parti paden di Guyana y Suriname.

   No obstante, secura na largo plazo ta sigui valido den parti nort di Guyana, y tambe e parti mas pabao di Jamaica.

   CariCOF a detecta, cu te cu 1 Augustus di e aña aki, un secura grave of peor na corto plazo a desaroya den parti west di Jamaica, y zuidwest di Trinidad, cu secura di largo plazo na parti zuidwest di Belize, Guyana Frances, parti nort di Guyana, parti west di Jamaica, y parti pariba di Suriname.

   Secura di termino largo na final di November ta evolucionando na Guyana Frances y Trinidad, y posiblemente por desaroya of sigui den parti west y zuidoost di Belize, nort di Guyana, y tambe isla di Tobago.

   Den un perspectiva climatico breve pa periodo di December 2024 te cu Februari 2025, e periodo aki lo marca e prome mita di e temporada seco Caribense, y e nucleo di e temporada frieu.

   “Ta pronostica un Nort Atlantico Tropical inusualmente calor, potencialmente combina cu condicionnan di La Niña.  Consecuencia di tur esey, temperaturanan di aire inusualmente halto y humedad lo sigui wordo detecta na hopi lugar, pero un caida constante den e stress di calor lo por wordo spera na November, ora cu e region ta haci transicion pa e temporada frieu na December.”

   Nan a indica cu e riesgo di efectonan meteorologico severo debi na ciclonnan tropical frecuente, of otro awacero, incluyendo yobida torencial cu inundacion, y demas impactonan debi na esey, lo por ta di awor na un nivel hopi halto te cu December na Belize, pero subsecuentemente lo bay bira menos.  Toch ta mira cu lo bay tin awacero inusualmete copioso na Guyana, Jamaica, y islanan menor di Caribe, segun CariCOF a declara.