SANTO DOMINGO: Den un accion pisa contra narcotraficantenan, autoridadnan di DNCD na Republica Dominicana a sa di intercepta un cargamento di 460 paki yena cu cocaina.
Den e accion aki, nan a aresta un Colombiano y dos Dominicano, kendenan awor ta den man di Ministerio Publico den provincia di Peravia cu ta keda parti zuid di Republica Dominicana.
Marina di Republica Dominicana tambe a participa den e accion aki, como tambe Forza Aereo, y agencianan di inteligencia, coordina pa Ministerio Publico.
Tur cos a cuminza ora cu a detecta un speedboat tipo ‘Eduardoño’ riba lama na costa di Villa Sombrero di municipio di Bani. Oficialnan a move rapido y a intercepta e boto aki color blauw, sin nomber ni matricula, y cu tin un largura di 28 pia, y un outboard engine di 75HP. Aki a bin haya 23 bulto grandi, cu a contene e 460 pakinan aki di droga.
Tambe a confisca un walkie-talkie, un satellite phone, varios jerrycan di gasolin, awa, cuminda, y demas prueba. Posiblemente nan a caba di cruza Lama Caribe procedente di La Guajira na Colombia.
Den un siman di tempo, autoridadnan Dominicano a confisca mas di 1 ton di cocaina, y en total a aresta seis homber, esta tres Colombiano y 3 Dominicano.
