ORANJESTAD (AAN): Poco poco por mira con e dia ta acercando pa e Eleccion 2021. Falta 15 dia pa Diabierna 25 di juni cual ta e Dia di Eleccion Parlamentario aki na Aruba.
E emocionnan ta bira halto dia pa dia, apesar di e limitacionnan cu Covid-19 a trece cune. Sinembargo, tur proceso ta sigui segun ley electoral.
Ya cada e siman aki, Post Aruba a cuminsa reparti na e adresnan den cada bario e carchinan di voto (Oproepingskaart) cual ta duna e votador e indicacion cu e tin derecho pa vota den e proximo eleccion aki na Aruba y ta mustre tambe den cual stemdistrict y den cual stembureau e lo mester acudi pa emiti su voto, ademas di e orario.
E biaha aki ta poni un orario sugeri teniendo cuenta cu e situacion di aglomeracion cu por surgi, den cuadro di Covid-19.
Segun Registro Civil y Censo, prome cu 17 di juni tur votador lo mester a haya nan carchi di voto.
Personanan cu no a ricibi nan carchi di voto na cas pa dia 17 juni 2021 por pasa busca un duplicado na oficina di Censo, situa na Schoolstraat 2 riba e siguiente dianan y orario:
Diahuebs 17 juni 2021: 16:00-18:30 or
Diabierna 18 juni 2021: 16:00-18:30 or
Diasabra 19 juni 2021: 09:00-15:00 or
Pa e votado cu NO TIN NINGUN medio di identificacion valido, por pasa tambe durante e dianan y orario ariba menciona pa regla esaki.
