ORANJESTAD (AAN): Riba Diaranson durante un ceremonia, gerencia di Divi Phoenix Hotel y directiva di Federacion di Trahadornan di Aruba (FTA) a yega na otro un biaha mas por medio di un Contrato Colectivo di Trabao.
DIARIO a compronde cu den e CAO nobo aki, a confirma tur e beneficionan existente como tambe a logra varios beneficio adicional manera aumento di dianan di vacacion y ampliamento di e posibidadnan pa spaar.
Ademas a acorda un aumento di 8.5% di salario dividi den e 3 añanan cu e CAO tin valides.
Di parti di FTA, nan a gradici e team negociador di Divi Phoenix, cu a consisti den su totalidad di hende muher. Tambe e team di FTA cu pa medio di nan esfuerzonan a yega na un resultado na agrado di tur envolvi.
Finalmente Sindicato kier a duna tambe un palabra di danki na tur empleado miembro di e organizacion, cu pa mas di 15 aña a sa di pone nan confianza den FTA pa representa nan den nan asuntonan laboral. Den union tin forsa!
Pa Divi Phoenix Resort a firma Pearl Lake (Gerente General) y Valerie Peterson (Financial Controller). Pa FTA a firma H. Geerman (President), y Rudy Geerman (Vice-President).
