Edwin Roos, presidente di Wit Gele Kruis Aruba
*esaki ta keda un reto grandi pa WGK
ORANJESTAD (AAN): Edwin Roos, presidente di Wit Gele Kruis Aruba (WGK) a elabora den un entrevista cu DIARIO, cu e demanda pa cuido di Adultonan Mayor ta hopi grandi. E grupo aki ta cay mas tanto den 'wijkzorg', cu ta e cuido den bario. En berdad tin un wachtlijst, na unda mayoria ta trata di hende di edad.
Roos a splica cu e cantidad di personal cu nan tin actualmente, nan no por acomoda e wachtlijst. Nan ta den combersacion cu Gobierno, cu ta e subsidiario di e parti aki, cu pa amplia e cantidad di hende lo yuda no solamente pa baha e wachtlijst, como tambe amplia e orario di servicio cu nan ta brinda, cu ta inclui diasabra caba, pero por ta tambe riba diadomingo y sikiera lo tin 16 ora pa dia cu hende disponibel pa cuido na cas di e ploeggroep aki.
Roos a enfatisa cu nan mester di personal, cu ta critico y no por pone ken cu ta pa haci e tipo di trabao aki. Den barionan tin diferente tipo di cuido cu ta wordo duna. E departamento aki lo ta uno ideal pa un studiante di zorg cu a caba di gradua na EPI, pa cuminsa cerca nan y asina haci tur e facetanan y crea e experticio cu nan mester pa ofrece un cuido mas specialisa na cas, cu hopi biaha ta trata di hende di edad avansa. Mientras cu esnan cu mas experiencia por bay atende casonan cu necesidadnan mas specialisa. Naturalmente si nan kier amplia nan cantidad di empleadonan, mester tin fondonan pa esaki, y como Wit Gele Kruis no necesariamente mester bati na porta di Gobierno di biaha pa un subsidio. Un otro forma tambe ta algo cu nan tin experiencia di dje ta praktijkondersteuners di huisarts, cu ta un contract cu nan tin cu AZV. Si tin un instancia cu por financia esaki, nan lo bay firma un contract cu nan pa asina amplia e cuido di e Adulto Mayor, specialmente na cas.
Un di e metanan cu WGK tin, cu ta alinea cu Gobierno, ta pa Adultonan Mayor por biba na nan mesun cas mas largo cu ta posibel, y den opinion di Roos, esaki ta bal un inversion, di cualkier financiado, cu por aporta na un proyecto asina.
Estudionan a mustra cu ta na beneficio di e salud mental di e Adulto Mayor pa keda den su mesun ambiente y cu su famia. Den e casonan cu esaki no ta posibel, sea pasobra nan no por biba nan so mas, of no tin famia cu por cuida nan, un por biba na un otro cas, na unda nan por biba semi autonomo, pero semper cu un cuido cerca. Por ehempel na Maris Stella tin 3 of 4 unidad asina, cu ta funciona hopi bon y e hendenan ta keda activo. Nan ta haci cierto cuido pa nan mes, manera cushina of haci cas limpi, pero pa cuido specialisa, den caso cu nan mester uza insulina of otro medicamento, tin hende ta pasa diariamente cerca nan pa percura cu tur cos ta na ordo. Roos a agrega cu tambe tin 'halve hulp' cu no ta specialisa den cuido, pero ta yuda den e cas di e Adulto Mayor. Esaki ta un servicio cu WGK ta organisa y coordina entre hendenan cu mester di cierto ayudo, cu no ta specificamente di cuido, pero ta haya un hende ta pasa algun ora cerca nan pa yuda nan den cualkier tarea diario y tene nan compania. Tur esaki tin como meta pa mehora e calidad di bida di nos Adultonan Mayor.
