ORANJESTAD (AAN): Dialuna mainta banda di 10:55 am, un unidad di Polis di Trafico a pone Central di Polis na altura,
cu un candela grandi di mondi a start den area di e birada di Santa Marta. E oficial ta pidi pa manda Bombero cu urgencia, y tambe tin di haya mas Polis pa controla e situacion di trafico.
Polisnan extra cu a yega, a bin nota cu ta trata aki di un candela grandi na e zona di excavacion y e mondi cerca. Dado momento e candela a bira mas grandi, produciendo huma preto diki cu tabata hasta stroba chauffeurnan di mira e caminda den e birada. Pesey a pidi un otro unidad di Polis mas pa cera e banda panort. E unidad di Polis mes a bay para banda panort, y banda pazuid Polis a keda na pia ta desvia trafico.
Bombero a yega y a bin nota cu e candela a cuminza plama den diferente direccion, mirando e hecho cu biento ta suplando fuerte. Bombero a cuminza ataca for di e banda pariba, y un rato despues otro unidad mas a yega pa controla e candela banda pabao y panort.
Polis a mantene e caminda cera te ora cu unidadnan di Bombero a paga e candela. En total a dura 2 ora pa asina a paga e candela completamente.
Ultimo dianan aki, por nota cu candela ta cende na diferente lugar. Hopi di nan causa pa automobilistanan cu ainda kizas ta zwaai cabito di cigaria for di bentana. Of otronan cu ta para cu nan auto cayente riba yerba seco, y esaki ta kima rapido.
Algun dia pasa mes, trafico riba Watty Vos Boulevard a casi paraliza, debi na candela grandi causando huma preto tabata sali for di pida mondi na Sero Patrishi.
