Pakico no por baha tarifa ainda
ORANJESTAD (AAN): E ta un preocupacion ya caba di hopi gremio na Aruba, te cu nan a hasta reuni cu varios stakeholder di e clase trahador y gremio comercial, pa puntra di con ainda WEB Aruba NV no por baha tarifa di awa y electricidad.
Na comienzo di luna di Maart, gremionan a tene un conferencia di prensa y cu DIARIO a publica esey na forma amplio caba, unda Tisa LaSorte di AHATA a indica cu e gremionan ta decidido riba algo! Gremionan kier mira finanzas di WEB Aruba NV pa haya sa pakico tarifanan a keda halto pa comunidad
Gremio- y Sindicatonan aki a divulga cu dia 1 di Februari 2023 caba nan a manda un carta pa Gobierno y Februari a finaliza y no a haya ningun contesta riba esey. Pa e motibo aki, e Gremio- y Sindicatonan aki a dicidi na bay publico pa informa pueblo di e grupo aki, y e desaroyonan cu nan ta mirando.
Un di esnan cu a hiba palabra tabata Tisa LaSorte di AHATA kende a elabora riba e peso duro cu e aumento di awa cu 26% y aumento di electricidad cu 24% a afecta pueblo mas di 6 luna pasa.
E aumento a afecta henter comunidad, pues no djis gremionan. E tin aworaki tur hende na Aruba ta pagando dimas.
Kizas comunidad a ripara e aumento aki mas durante Augustus 2022 y September 2022 como cu eseynan tabata lunanan di mas calor, pues tin mas consumo e ora. Kizas ta pagando un tiki menos awor na 2023, pero esey no ta bin debi cu tarifa ta mas abao. Pues tin di corda cu ainda comunidad ta pagando di mas, pues esey ta placa cu hende por ta usando pa otro cos di necesidad na nan cas.
Mientras tanto e tarifa di HF Oil cu WEB Aruba NV ta usa tambe a baha compara cu di aña pasa cu Aruba a aumenta tarifa, pues tin varios manera cu e planta di awa y electricidad a spaar placa.
“Kiermeen nos kier wak e finanzas e ora di WEB Aruba NV, pa nos mira e motibo pakico e tarifanan aki mester keda halto ainda pa comunidad,” LaSorte a indica.
Pesey e carta manda fin di Maart, AHATA ta follow-up atrobe riba multiple carta pa pidi eliminacion di e subida di tarifa di awa y coriente cu a ser implementa debi na e guera na Ucrania.
Pero AHATA ta mustra cu desde cu a instala e planta RECIP IV na Juni 2022, WEB Aruba NV mes a declara publicamente cu nan a reduci nan uso di Heavy Fuel Oil (HFO) cu 25%, cu nifica cu ta spaar 800 bari pa dia.
Si asumi e prijs promedio di HFO (incluyendo transporte, etc) di como $70 pa bari, e uso mas abao ta pone WEB Aruba NV spaar minimo $56.000 pa dia.
Costo di combustible consecuentemente ta como 110.240 Florin pa dia, 3.048.967 Florin pa luna, y 36.587.600 Florin pa aña.
Nan ta calcula cu e ganashi adicional cu WEB a logra di como 120 miyon Florin debi na e aumento di tarifa aki, agregando e extra 36 miyon Florin pa luna cu a spaar debi cu ta usa menos HFO, ya caba lo mester a trece un mehoramento significante den e bienestar financiero di WEB. Consecuentemente e peso cu a wordo pusha riba schouder di comunidad cu e aumento di tarifa tin di wordo elimina. WEB, como compania publico y estatal, mester ta transparente pa cu su situacion financiero actual y suministra pueblo cu e resultadonan financiero di 2022 lo mas pronto posible.
Mientras tanto, e gremionan di AHATA, ATIA, CUA, WAB, KvK, FTA, SEPPA, SADA, SIMAR, STT, ABV, OPPA, y SPA ta pendiente di haya un invitacion di WEB pa un reunion, segun nan ultimo carta di Maart 2023.
