Miosotis Tromp, Trahado Social di FADA:
ORANJESTAD (AAN) – E trahador Social di Fundacion Anti-Droga Aruba (FADA), Miosotis Tromp, den un entrevista cu DIARIO a duna di conoce cu nan tin un campaña di Amigo Didi, pa campamento, mirando cu esaki ta un temporada hopi druk, no solamente den famianan cu ta bin hunto pero tambe amistadnan.
E campaña ta pa concientiza e comunidad riba e uso di alcohol. El a bisa cu enberdad esaki ta algo cu no por evita, pero si por keda concientiza comunidad pa hacie na un forma sano y limita, specialmente si e persona tin cu core bay cas bek.
Tambe e concientizacion ta pa famianan pa vigila nan yiunan ora nan ta den lama, pa no surgi un desgracia cu despues por lamenta.
Amigo Didi ta bay ta parti den dos grupo un na parti pariba y otro parti pabao di e campamentonan pa asina trece dilanti e foyetonan di Amigo Didi cu informacion, pero tambe pa duna danki pa e sosten cu nan ta ricibi. Nan a duna un bala tambe pa hacie un tiki mas visible. E bala ta pa e famia hunga cune pero tambe pa tin Amigo Didi visible, y corda riba limite pa bebe alcohol. E cantidad di balanan ta limita asina ta cu nan ta dune pa grupo.
E campaña a cuminza Diamars 26 y lo sigui Diahuebs y na San Nicolas y vecindario lo ta Diasabra y Diadomingo venidero. Tin diferente boluntario cu ta pariba di brug pa duna e foyeto y tambe e bala. E foyeto ta pa informa kico ta alcohol y su efectonan, consecuencianan y cuanto ta e boet si polis ta haya un hende bao influencia ta stuur.
