Cinthia Quant, Program Manager na FCVR:
*Ya sea violencia relacional, di genero of domestico
ORANJESTAD (AAN): Durante un lectura cu a tuma lugar dialuna atardi, psicologo y Program Manager di Fundacion Contra Violencia Relacional (FCVR), Cinthia Quant, el a splica den entrevista cu DIARIO c'un aspecto interesante cu a ser treci dilanti tabata e convenio di Internacional Labor Organization (ILO) cu a keda introduci na 2019, caminda ta duna recomendacion riba e rol di e dunado di trabao den e tematica di violencia di genero y acoso.
E cambio aki ta uno historico relaciona cu e responsabilidad di e organisacion di mehora e bienestar di e victimanan di violencia di genero.
ARUBA
E psicologo a señala cu na nivel di pais no tin un legislacion specifico, pero tin cierto convenionan cu por cuminsa haci uzo di dje como guia.
El a enfatisa cu por ehempel, ta importante pa den sector laboral conoce señalnan di violencia manera absentismo, meld AO, cu e persona ta hopi irita, etc. Ta importante cu si pa algo pasa, por tin un oido pa e persona cu posiblemente ta un sobreviviente di violencia, a bisa.
Retonan
Aruba no tin un legislacion specifico pa atende cu casonan di violencia, ya sea violencia relacional, di genero of violencia domestico. Na diferente pais, ta uza diferente definicion pa atende cu e problematica aki, Quant a splica.
El a agrega cu door cu na Aruba no tin un legislacion specifico ni articulonan cu ta bay indica esaki tin cu haci riba e area di respuesta of di prevencion, kende tur mester envolvi. Na e momentonan aki no tin 'guideline'.
P'esey ta lucha p'e y ta splica dicon ta importante. Codigo penal, por ehempel, por bisa cu e caso ta trata di un 'mishandeling', esta un maltrato, pero e no ta diferencia un maltrato cu ta pasa riba caya cu un maltrato cu ta pasa na cas y cu por ta un violencia mas structural. Na Aruba no ta diferencia esey y si no ta reconoce no por atend'e adecuadamente, Cinthia Quant a declara.
Pocopoco, FCVR ta purbando mas y mas di ta eyfo pa splica kico ta violencia y den esaki comunidad tambe tin un rol.
