Campaña di Accion pa comunidad entrega arma di candela ilegal

Accion Policial den Caribe Hulandes

ORANJESTAD (AAN): Cuerponan Policial di Caribe Hulandes den cooperacion cu e Colegio di Hefenan di Cuerpo (college van korpschef), ta anuncia lansamento di un accion interinsular relaciona cu entrega di arma di candela ilegal.

   E iniciativa conhuntamente ta un colaboracion di e organizacionnan di Caribe Hulandes cu cooperacion di Ministerionan Publico di Aruba, Curaçao, Bonaire, Saba, St. Eustatius y St. Maarten.

   Pa prome biaha tur e islanan aki simultaneamente ta traha riba un accion di entrega di arma di candela ilegal. E meta principal di e accion coordina aki ta, pa brinda tur esnan cu ta den posecion di un arma di candela ilegal, e oportunidad pa di un forma boluntario entrega esaki durante di un periodo determina, sin cu e tin consecuencia penal pa violacion di e ley di arma di candela.

   Cu e accion colectivo aki e islanan kier manda un mensahe fuerte: arma di candela ilegal y violencia cu arma no ta wordo tolera den nos comunidadnan.

   E proyecto ta refleha e responsabilidad comparti di tur e islanan pa hisa e seguridad publico. E momento sincronisa di e accion ta demostra e strategia regional di union, pa alcansa na reduccion di e cantidad di armanan di candela ilegal cu tin den circulacion y asina preveni tambe e cantidad di violencianan cu arma di candela.

   A base di resultado di e accion aki, e cuerponan hunto cu Ministerionan Publico lo intensiva e esfuersonan. Esaki door di eherce controlnan y entradanan hudicial cu lo bay tin na tur parti y sitionan riba e islanan, buscando arma di candela ilegal.

   Cuerponan policial di tur e islanan ta haci un yamada na tur ciudadano pa asumi nan responsabilidad y contribui na un sociedad mas sigur, door di haci bon uso di e oportunidad encuestion.

  Dor di entrega bo arma di candela ilegal awor, bo ta evita di keda persigui penalmente y ademas bo ta salba bida.

   Mas detaye tocante temporada, localidad y procedura pa entrega di arma di candela, lo keda comunica door di cada Cuerpo policial individualmente, den e dianan cu ta sigui.