Parlamentario Setty Christiaans-Yarzagaray: --- *Ainda no a wordo trata den Parlamento
ORANJESTAD (AAN) – Diaranzon mainta, fraccion di Partido MEP a yama su conferencia di prensa, den cual Parlamentario Setty Christiaans-Yarzagaray a elabora tocante e ley di 'overbruggingstoelage' cu ta un ley cu a wordo presenta na Parlamento, y cu Yarzagaray a scucha hopi reaccion al respecto, di otro lidernan di fraccion.
Parlamentario Yarzagaray a splica cu esaki ta regarda un ley, cu su articulo 4 ta bisa cu na momento cu baha di e funcion di parlamentario of minister, pa evita un caida drastico y abrupto den entrada, por apela pa un overbruggingstoelage.
Yarzagaray a comenta cu e lidernan di MAS y Accion 21 ta bisa cu esaki ta algo robes djis pasobra pais Aruba ta cambia un ley, di simplemente un fecha, y cu no tin ningun implicacion financiero, ya cu e ta simplemente cambia dia 1 di e siguiente luna pa e fecha cu un politico cu no ta minister of parlamentario mas, por cobra su 'overbruggingstoelage'. Setty Yarzagaray a expresa cu no ta su persona a traha e ley, pero nan a haye den e sistema di leynan di Aruba caba.
E parlamentario a duna un ehemplo di loke a pasa na aña 2021. “Na momento cu un gabinete baha y otro subi, esnan cu no ta regresa den Parlamento of como minister tin e derecho, segun articulo 4, di cobra un overbruggingstoelage. E ley ta indica cu na momento cu bo stop di ta parlamentario of minister bo mag di cobra 'overbruggingstoelage' desde dia 1 di e siguiente luna. Cu tur respet pa e ley, y mi ta kere cu hopi hende no a ripara e buraco, y mi tin sigur cu por ehemplo, e lidernan di partido sa cu mester ta hopi bon para pa cubri nan mes, pero no nos cu a bin ta traha desde semper, cu nos a lanta manera muchanan di Aruba, traha pa yega na nos cosnan.
Na momento cu mi a traha te dia 7 di Juli den Parlamento, ta nifica cu for di dia 8 te dia 31 di Juli mi no a cobra. Pero mi tin mi gastonan si! Mi tin cu paga mi cas, mi gastonan di cas, mi auto; pero si mi ta cu un cuarto parti di mi salario con mi ta cubri mi mes? Locual gobierno a haci ta cu el a cambia e palabra pa na momento cu e politico termina, e por cobra su overbruggingstoelage mesora. Pakico? Na prome lugar pasobra overbruggings hustamente kiermen esey: con pa sostene e politico cu ya tin su gastonan, pa cubri e resto di e luna si el a cay ni na un cuarto parti di salario. Pa e motibo aki, e cambio di ley aki no tin ningun implicacion”, Parlamentario Setty Yarzagaray a menciona.
El a agrega cu el a kere cu e lidernan di MAS y di Accion 21 tin un tiki mas pensamento di calculacion, pasobra e no tin ningun implicacion financiero”.
Pa conclui e tema en cuestion, Yarzagaray a bisa cu e ley aki no a wordo trata ainda den Parlamento, e tey pa wordo trata y den su disertacionnan den Parlamento e lo bolbe trece e ehemplo aki dilanti.
