Cambio den e 'Landsverordening Politie' a pasa den Parlamento pa loke ta uzo Camara di Vigilancia

Minister Rocco Tjon a duna di conoce:

*Lo amplia personal pa Centro di Comando Operacional

*Trabao di polis lo bira mas eficiente y eficaz 

 ORANJESTAD (AAN) – Minister di Husticia y Asunto Social, a bay Parlamento pa defende un cambio den e ley existente, esta e “Landsverordening Politie”. Un ley cu a wordo aproba for di aña 2016 caba, kiermen for di 2016 tin e base legal pa polis por haci uzo di camaranan, pa nan trabao.

            Minister Tjon a bisa cu Camera Surveillance tambe ya tin su base legal, den e ley ey tin tur e clausulanan pa garantiza privacidad, etc. Polisnan y ambtenaarnan cu no ta polis, pero cu ta traha na Cuerpo Policial, mag di traha den e Operational Command Center.

            “Pero awo nos a cambia esaki, nos a ampli’e, hacie posible cu ambtenaarnan cu no ta traha den KPA of niet ambtenaarnan tambe por traha den e Centro di Comando Operacional, obviamente bao supervision di Cuerpo Policial”, e dignatario a splica.

            Minister Tjon a bisa cu esaki tin diferente motibo. Por ehemplo, por haci uso di mas personal, di mas experticia cu kizas no tin aworaki, y di e forma aki tambe por garantiza cu 24 ora pa dia tin hende ta traha den e Operational Command Center.

            Obviamente a tene cuenta cu tur e diferente veiligheids clausules; e persona cu ta bay traha eyden ta wordo gescreen door di Veiligheidsdienst di Cuerpo Policial. El a agrega cu nan no por tin antecedentenan, nan mester tin declaracion di bon conducta, nan  ta haya un aanwijzing di Hefe di Polis den cual ta defini tur nan tareanan, kico nan mag y vooral kico nan no mag, articulo 62 y 63 di LMA, cu ta regla esaki pa ambtenaarnan, tambe ta vigente pa esnan cu ta bay traha eyden.

            “Kiermen, den e forma aki nos ta colabora mas den full e cadena hudicial, y ta haci posible cu 24 ora pa dia tin vigilancia y personal pa traha den dje”, Minister Tjon a reitera.

            E mandatario a splica brevemente encuanto e Operational Command Center, bisando cu e no ta solamente e parti di camara, pero nan ta trece tur e diferente disciplinanan hunto, Central di Polis ta bay muda pa Centro di Comando Operacional aki, e Radar Kamer Team ta muda pa eynan, y tur e operadornan cu ta traha den cuadro di Camara Surveillance.

            “Esaki ta haci posible cu pa prome bez, di berdad nos por bay traha na estilo ‘real time intelligence’. Kiermen, e polis cu ta riba caya na un incidente ta haya informacion real na e momento ey, y esaki ta haci obviamente, e trabao di polis mas eficiente y mas eficaz pero e ta eleva seguridad di e propio polisnan”, Minister Rocco Tjon, titular di Husticia, a enfatiza.