ORANJESTAD (AAN): Minister Albert Ramchand Ramdin di Suriname, acompaña pa un delegacion comercial a reuni cu representantenan comercial local durante Business Connect.
Minister Geoffrey Wever, a traves di unidad ARINA di Departamento di Asuntonan Economico a facilita un Business Connect entre representantenan comercial di Surnam y empresarionan local di retail y wholesale.
Minister Ramchand Ramdin, cu Prome Minister Wever-Croes y Minister Geoffrey Wever a adresa e delegacion comercial y informa tanto sector comercial di Aruba como esun di Suriname cu ambos pais kier pa tin mas lazonan comercial y cu nan ta stimula pa sigui explora oportunidadnan di inversion.
Durante e reunion, a resalta e compromiso di e delegacion Surnameño pa yuda facilita un mision comercial pa Surnam den e curso di e aña. E enfasis tabata riba crea un plataforma pa dialogo directo y fructifero entre empresarionan di ambos pais, y pa concretisa pasonan practico cu por beneficia e clima di inversion y colaboracion comercial.
E intercambio aki ta den liña cu e vision di Gobierno di Aruba di promove un ambiente mas atractivo pa inversion na Aruba, y simultaneamente, di fortalese lazonan economico cu paisnan bisiña. E enfoke a keda tambe riba e importancia di mantene relacionnan economico estrecho y constructivo cu Suriname, cual por ta un oportunidad.
E combersacionnan durante e evento a demostra un entusiasmo mutuo pa explora y desaroya iniciativanan comercial nobo, y pa probecha e oportunidadnan cu e relacionnan mas cercano aki por brinda.
