ORANJESTAD (AAN): Solo ta fuerte e dianan aki, y e ta afecta no djis e ser humano, pero tambe fauna di e isla.
DIARIO a topa cu e famoso buriconan cu ta cana rond den area di Colony, buscando sombra bao di algun mata di kwihi.
Hopi biaha danki na algun voluntario cu ta core bay te den area di Grapefield y Colony, cu nan ta hiba wortel y appel pa e bunita animalnan aki haya algo di come. Varios ta hiba baki di awa tambe pa pone nan bebe.
No ta conoci si acaso tin un plan di instancianan concerni, pa nan mes traha un sorto di baki un caminda, y percura pa esaki wordo yena regularmente pa asina e buriconan aki haya algo di bebe.
Pero aki bo ta mira cu nan tambe por cansa, y nan tambe ta busca lugar pa haya sombra. Y no tin hopi lugar amplio mas pa nan busca un espacio pa huy di e solo fuerte di tur dia.
Un ciudadano a splica, cu si acaso pone un lugar vast cu baki pa cuminda y awa, e ora e buriconan aki lo no bay keda ‘molestia’ habitantenan den Colony ta benta baki di sushi abao, etc., den buskeda di cuminda.
