BERLIN: Lidernan Aleman a bay di acuerdo pa Gobierno di Alemania stop di paga pa e PCR-Rapid test di Covid-19, pa asina encurasha mas hende pa bay tuma e vacuna.
Esey ta debi cu hendenan no-vacuna ta keda wordo rekeri pa haci test.
Alemania ta cla pa cuminza suavisa medidanan den proximo lunanan, pa tur hende na Alemania cu a wordo vacuna of a recupera di Covid-19, segun un decision tuma Diamars pa Angela Merkel y demas lidernan Aleman.
E testnan gratis di Covid-19 subsidia pa Gobierno tambe lo yega su fin.
Despues di e reunion, Merkel a bisa cu Alemania mester encurasha mas hende pa bay tuma e vacuna, como cu e ta suministra ‘proteccion pa tur hende’. E chancellor a bisa cu e cantidad di casonan nobo di Covid-19 na alemania, ta wordo completamente atribui na hendenan cu no a vacuna nan mes ainda.
Vacuna gratis envez di test gratis:
Awor cu e casonan di contagio ta subi, Gobierno ta enfoca riba esnan cu ainda no a tuma e vacuna, segun Merkel a bisa. El a agrega cu lo ta ideal pa mira e grado di vacunacion yega mas di 70% y kizas hasta 80%.
Como cu Gobierno por ofrece vacuna na tur ciudadano na Alemania, nan a dicidi pa elimina e test gratis di Covid-19 pa tur hende entrante 11 di October. Despues di e fecha ey, hendenan tin di bay paga pa haci nan mesun Covid-Test ora cu e ta rekeri. Aunke lo exclui mucha y teenagernan cu no por wordo vacuna, y tambe hendenan cu no por haya vacuna pa motibonan medico.
Esnan cu no ta vacuna y cu den futuro tin di haci test regular ora nan drenta un lugar cu otro hende, nan lo tin di bay habri nan cartera pa paga pa esaki riba nan mes.
