Tarifa di $10 ta planea tambe pa e islanan ABC - *Impuesto lo wordo paga un biaha pa aña
ORANJESTAD (AAN): Informacion cu a drenta for di Bonaire ta indica cu e isla ruman aki kier introduci un impuesto pa turista di $50 pa persona, esaki alomenos pa turistanan cu no ta procedente for di un di e islanan cu ta forma parti di Caribe Hulandes.
Tourism Corporation Bonaire (TCB) hunto cu autoridadnan di aeropuerto a tene un conferencia di prensa dialuna atardi pa asina anuncia e plan aki.
E idea ta pa e impuesto aki wordo recauda un biaha pa aña pa turista y lo tin posibilidad pa paga esaki online y despues di haci esaki e turista lo ta den posibilidad di viaha pa Bonaire varios biaha cu un codigo special (barcode) sin mester di paga cada bes.
Cu e introduccion di e impuesto nobo aki, e 'room tax' y e 'car rental tax', entre otro, lo wordo elimina.
Lo tin un tarifa special pa e residentenan di e islanan ABC y di Sint Maarten, Sint-Eustatius y Saba. E residentenan di e islanan aki lo paga solamente $10 na lugar di $50. Ademas lo tin un tarifa special pa muchanan menor di 12 aña.
Ta spera di por introduci e impuesto aki entrante 1 di Januari 2021. Ta trahando tambe riba un impuesto mas halto pa turismo crusero, cu ta spera lo drenta na vigor na September 2022.
