Bon Comun y e rol di dje como arkitectura pa futuro

ORANJESTAD (AAN): Durante Conferencia bon ricibi den comunidad di Bon Comun teni siman pasa, un di e oradornan a describi e Bon Comun como e arkitectura pa construccion di un miho Aruba, pa futuro.

   Segun su punto di bista Bon Comun ta un grupo di principio cu nos por uza pa duna forma nobo - cu dignidad, oportunidad y prosperidad comparti – na nos pais. E mensahe aki a keda resona den Minister di Vivienda, Infrastructura y Telecomunicacion, drs. Rene Herde, su mente. E principionan di BON COMUN ta hopi mas cu djis bisa cu mester percura pa nos pais haya mas entrada, miho enseñansa, miho cuido medico of traha mas cas. Nan ta bisa nos y guia nos con pa haci tur esaki pa sigura cu henter nos comunidad, awo y den futuro, por beneficia di e trabao cu nos haci awe.

   Vivienda y Infrastructura no solamente ta un grupo di sectornan tecnico caminda cada un ta haci algo otro, pero tambe nan por ta un expresion fisico di nos deseo pa construi un miho Aruba pa nos tur. Construi un cas no solamente ta pone un dak riba cabes di un famia y crea paz, alegria y seguridad; c’un cas un famia ta bira parti di un comunidad cu ta biba hunto y cuida otro. Inverti den cas, caya y barionan, ta mas cu basha concret y asfalt, e ta duna nos oportunidad pa crea un comunidad cu ta comparti hopi mas cu otro cu solamente espacio fisico. E ta crea oportunidad pa nos siña conoce otro miho y asina crea amistad y famia pa bida. E BON COMUN ta yuda nos haci esaki. No ta miho pa nos biba den un bario caminda hende ta yuda otro cria y lanta yiunan hunto, cuida cas di otro y bira grandi hunto como bon amigo? E BON COMUN ta duna nos oportunidad y guia pa haci esaki. 

  Si pensa asina, cada cos cu nos haci, lo contribui na un comunidad cu por wak pa otro en bes di cada un djis wak pa nan mes sin tene cuenta cu bida di otro. Den Infrastructura y Vivienda, den Telecomunicacion y tur otro area di gobernacion, e BON COMUN tey pa yuda nos tuma decisionnan cu ta haci mas cu traha cas of pone caminda. E mester yuda nos construi barionan y caminda cu ta yuda mehora e calidad di bida pa tur hende. E ta yuda diseña un comunidad cu nos tur lo gusta biba aden.

   E principio di BON COMUN lo yuda nos haci escogencia y tuma decisionnan cu lo impacta nos bida diario pa generacionnan venidero. Nos decisionnan mester ta bon funda cu flexibilidad, accesibilidad y responsabilidad climatico central y no opcional. Pesey en bes di traha cas, nos mester traha barionnan nobo cu espacio pa hunga, cuida y crece cu otro. Nos barionan mester tene cuenta cu e necesidad di hendenan mayor di edad y di famianan hoben. Mester tene cuenta cu e capacidad financiero di cada un, pa sigura cu tur por yega na un bunita hogar pa nan famia. Inversionnan cu gobierno haci mester yuda tur yega na un bida digno y di calidad, pa reduci desigualdad existente.

   Pa promove bon comun ta crucial pa tin bon colaboracion. Gobierno no por actua su so, mester cooperacion di sector priva, instancianan financiero, companianan di construccion y comunidad en general.

    BON COMUN ta un grupo di principio simpel, pero den practica hopi exigente. Nan ta exigi pa percura pa tur hende - no obstante di nan entrada financiero - por biba trankil y sigur. E ta exigi pa organiza nos comunidad di tal forma cu tur parti di nos comunidad ta bira parti integral di nos pais. Esaki no solamente ta elementonan di un bon maneho di infrastructura di nos pais, e ta algo cu nos ta sinti como nos responsabilidad pa haci y asina yuda crea un miho comunidad pa nos tur.