Bon ambiente cultural y crioyo durante e temporada di Dia di Brazil

ORANJESTAD (AAN): Fundacion Chico Harms ta lansa e temporada di Dia di Brazil 2024.

E Dia di Brazil ta tur aña riba e prome diadomingo di september, e aña akiriba 1 di september 2024.

            Na Boneiro nan ta celebra nan Dia di Rincon, asina aki, na Aruba nos ta celebra nos Dia di Brazil. Un temporada pa celebra nos musica crioyo, nos trahe tradicional, nos cuminda local, nos cultura Arubano den bon ambiente den e bario di Brazil. 

            E temporada ta cuminsa cu Parada Acustico, sigui pa Festival Cantica di Caya y Coronacion di Reinan Cultural, finalizando cu Parada di Lanterno y Parada Folklore Cultural riba e Dia di Brazil. Esaki t’e calendario di e eventonan binidero: 

27 di juli: Festival Cantica di Caya Adulto

28 di juli - Festival Cantica di Caya Infantil & Hubenil

17 di augustus - Batacaso Tipico

24 di augustus - Coronacion di Reinanan Cultural

30 di augustus - Parada di Lanterna

31 di augustus: Fiesta di Tambu

1 di september: Parada Folklore Cultural y Dia di Brazil 

            E siguiente evento ta e Festival Cantica di Caya, unda nos lo conoce e cantica cu ta bay domina caya durante e temporada aki. Durante e Festival, e bandanan local ta lansa y competi cu canticanan nobo. Kier e invita henter Aruba pa join nos Festival! E Festival ta na Centro di Bario Brazil.

            Brasa Bo Cultura, Aruba! Ban celebra, goza y engrandece nos cultura. Fundacion Chico Harms kier a gradici tur su patrocinadornan pa e sosten.