Bishitantenan cu ta bin Aruba facilmente ta drenta cu mangelnan di droga

Rulienne Arends di FADA:

ORANJESTAD (AAN):   Segun informacion suministra door di Rulienne Arends, Trahado Preventivo di Fundacion Anti Droga Aruba (FADA), el a haya sa for di bishitantenan cu ta bin Aruba cu facilmente nan ta drenta cu mangelnan di droga (gummies).

            FADA a haya e paki di esaki, sin e gummies, unda cu ta wak cu ta mustra cu e paki ta contene mangel, pero riba e paki mes ta bisa bon cla cu e ta contene THC, mescos cu baranan di chuculati cu ta contene mushrooms, por ehempel ta cosnan cu ta drenta Aruba facilmente.

            No ta algo cu FADA ta topa hopi bao di hobennan. Nan no ta mencion'e hopi mas, pero no ta kita afo cu e ta presente, Arends a remarca.

            Cada pasa un tempo FADA ta tuma contacto cu Douane. Nan mes ta duna FADA charla tambe riba e cosnan cu nan ta topa cu ne. Douane ta haci nan best pa gara mayoria di e productonan aki. Pero den e caso aki, si no ta pone atencion na e contenido, e ta mustra cu e por ta simplemente un pak'i mangel, a bisa.

            Marihuana cu alcohol ta e droganan cu mas ta keda resalta durante e charlanan na scol. Muchanan sa hopi di dje. Nan sa hopi di marihuana, por ehempel, y te hasta nan ta duna un par di nomber di caya cu constantemente ta cambia, e representante di FADA a splica.

            Na momento c'un hoben sa asina hopi di un substancia, bo ta pensa el lo tin'e hopi cerca di dje. Tin ora ta informacion cu el a haya di internet. Pero ora cu ta bay den profundidad riba e prijs pa gram, con e ta wordo bendi den sakito, con e pildernan ta cu hopi detaye ta pasobra nan tin'e hopi cerca of cu nan a cuminsa experimenta cu e droganan aki caba, Rulienne Arends a indica.