Bingo pa yuda 500 mucha na Aruba bay scol bek

ORANJESTAD (AAN):  Durante un conferencia di prensa diaranson mainta, Fundacion Mi Voz Ta Bo Voz a bin cu mas informacion relaciona cu nan proyecto di 'back to school 2021'.

Lisette Gomes di e fundacion a duna di conoce cu e biaha aki nan a agrega un actividad pa renforsa e campaña di 'back to school' pa asina nan yega nan meta y yuda 500 mucha.

   Den mas o menos 3 dia a haya registracion di 500 mucha y ainda nan telefonnan no a stop di sona cu yamadanan di mayornan cu no por aford y duna nan yiunan tur lo necesario pa e aña escolar nobo, a señala. Pesey dos siman pasa a bin cu e campaña di 'Adopt a Child' unda pa 150 Florin por aporta  pa un mucha haya e articulonan basico pa scol.

   Pa cu esaki a organiza un 'bingo night' cu lo tuma lugar diasabra 31 di Juli pa 7’or di anochi via DiarioTV Canal 48 of e Facebook Page di Bingo Aruba.

Pesey un yamado a bay na comunidad pa yuda cu e 150 Florin of pa yuda cu e 'bingo night' cual ta costa solamente un suma chikito y te hasta ganando premio.

Te cu aworaki tin 10 punto di benta, pero cualkier compania cu kier yuda e fundacion pa ta un punto di benta ta mas cu bonbini, Lisette Gomes a remarca.

Durante e conferencia di prensa, Lisette Gomes tabata acompaña pa Madelaine Solognier di Bingo Aruba y I am Jeremy Wever, kende a encurasha comunidad pa ta parti di e bunita causa aki.