DIARIO ta entrega prueba di veracidad na vispera eleccion Hulandes
- Firmeza di Gobierno di Aruba ta bira yabi pa relacion cu Reino
- Progreso electoral di extremista Wilders ta e señal na horizonte
ORANJESTAD(AAN)- Dia 10 di Januari 2022, Gobierno Mark Rutte number cuatro, a haci su entrada na Hulanda. Aruba tabata entusiasma cu e entrada di Alexandra van Huffelen, cu a crea e impresion cu lo por cambia e ambiente den Reino. E debe nacional, cu a wordo crea durante gobernacion di Mike Eman cu a haya aplauso y despues humiliacion di Hulanda, a bira e appel di discordia ora Covid-19 a bati na porta.
Cu entrada di Alexandra van Huffelen, e pensamento tabata cu Van Huffelen lo a habri porta pa mihor relacion cu Hulanda y Reino, maneha pa Gobierno Mark Rutte cu a kibra record di permanencia na poder na Hulanda.
For di momento di formacion di Gobierno Rutte IV tabata bisto cu Mark Rutte a cuminsa perde forsa politico y su partido respaldo di e Pueblo Hulandes.
Contrario na loke a spera, Alexandra van Huffelen no a logra mantene e impresionnan cu el a crea na prome momento y DIARIO a mustra Aruba, cu Aruba mester a cuminza comprende cu mundo politico di Hulanda y asina di Reino, a drenta awanan sumamente turbulento cu Pueblo di Hulanda demandando cambionan grandi sigur riba tereno social.
“Un Hulanda cu ta produci fruta pa e Hulandes,”a bira mas y mas e exigencia politico y tal manera DIARIO a mustra hasta partidonan nobo a nace manera Boer, BurgerBeweging, BBB, y despues e partido di Pieter Omzigt, cu a separa su mes for di CDA, uno di e partidonan Hulandes cu no tin mucho speransa di voto mescos cu e partido di Alexandra van Huffelen cu no ta wordo ni menciona den e partidonan importante pa voto.
E partido di Mark Rutte a keda uno di esnan cu segun encuestanan tin mas chens pa sali ganador pero mientrastanto, manera DIARIO a mustra, fecha di eleccion ta bati na porta di Hulanda sin un indicacion cla di un ganador fuerte.
E partido cu ta base di Gobierno, VVD, a perde voto pero ainda ta na cabez, pero mester topa cu e menasa directo di prome lugar cu Partij van de Arbeid/Groen Links ta forma, mientras na tercer lugar tin awor Omzigt, cu ta e candidato nobo.
Central den tur e cambionan cu ta tuma lugar, ta sigur e forma cu te cu ayera, Geert Wilders di Partij voor de Vrijheid (PVV) tabata parce di ta progresa y hasta alcansa e grupo di partidonan cu mas voto den eleccion.
Den tur e desaroyonan na Hulanda, e progreso di Geert Wilders, cu un tempo tabata sostene e fraccion di VVD cu el a bandona pa lanta su propio partido, cu a haya asiento den Tweede Kamer y asina a yuda VVD forma Gobierno tambe na 2010.
For di e momento a parce cu portanan pa su participacion den Gobierno a cera mientras mas y mas e tabata postura su mes na favor di Hulanda pa Hulandesnan y contra por ehempel migracion cu ta uno di e problemanan mas serio di Hulanda.
Ayera tabata parce cu e partido nobo di Pieter Omzigt, cu for di e prome momento cu el a presenta su programa, manera DIARIO a trece dilanti, no a duna un bista real di e cambio grandi cu e kier a trece a trece, tabata sigui baha den e cantidad di voto mientras PVV di Wilders a cuminsa ta subi y segun e pronosticonan prome cu DIARIO a bay imprenta, tabata bon pa 22 pa 28 asiento.
Esaki ta parce di ta pone Wilders directamente den e linea di VVD di Mark Rutte, cu awor a baha di 26 pa 30 asiento. Un indicacion, segun observadornan, cu e Pueblo Hulandes ta sostene cu cambio mester bini na interes di e Hulandes, cu mester ta prome obhetivo di gobernantenan Hulandes.
E combinacion Groen Links/Parti van de Arbeid lo a bon pa 22 pa 28 asiento mientras e partido nobo di Omzigt lo por conta cu 19 pa 25 asiento.
Naturalmente den porta di eleccion tur cos por cambia ainda, sigur teniendo na cuenta cu ainda un cantidad grandi di Hulandes no tabata na haltura pa kende nan lo mester vota.
Manera DIARIO a adverti for di momento cu e posicion Hulandes enfrente Aruba a bira uno di blackmail enfrente Gobierno di Evelyn Wever-Croes, mester mira e presion di e Gobierno actual di Mark Rutte y sigur di di e partido D66 di Alexandra van Huffelen, den e problemanan politico na Hulanda.
Gobierno di Aruba a haci bon di para fuerte den su posicion, sigur si tuma nota di e forma cu Eerste Kamer, Senado Hulandes, tambe a reacciona y na un forma historico no a bay di acuerdo sin mas cu loke Gobierno y Parlamento Hulandes a dicidi, pero a lanza un serie di pregunta na Alexandra van Huffelen.
Hulanda ta na caminda pa urna electoral cu manera DIARIO a anuncia, ta bira un eleccion historico cu demandanan sumamente serio pa proximo Gobierno Hulandes y Reino Hulandes!
