Biblioteca Nacional di Aruba a evoluciona pa atende e necesidadnan di e comunidad Arubiano

Un recorido historico di Lagoenweg te George Madurostraat

*75 Aña di Historia y Progreso 

ORANJESTAD (AAN): “E bibliotecanan no ta tocante buki; nan ta tocante hende,”. Esaki ta un frase cu ta capta esencialmente e mision di e biblioteca durante tur e añanan.

            Na ocasion di e di 75 aña di existencia di e Biblioteca Nacional di Aruba, Sra. Astrid Britten, directora di e institucion, ta guia un recorido  tocante e historia y desaroyo di e biblioteca durante un programa special cu lo tuma lugar diamars 20 di augustus pa celebra e ocasion aki dirigi na e empleadonan.

            Mañan diamars parti mainta, BNA lo ta cera pa publico pa asina dedica na e programa aki caminda lo tin varios presentacion y actividad special.

             E recorido rond di e 75 añanan aki a cuminza dia 20 di augustus 1949, dia historico caminda e primer biblioteca publico na Aruba, conoci como Biblioteca di Gobierno, a habri su porta na oficina di Gezaghebber.

            Sra. Britten a enfatiza e importancia di e esfuerzo di e pioneronan, manera dr. W.J. Goslinga, cu a traha pa stimula e gana di lesa door di difusion di bon buki y hiba cultura Hulandes cerca e hubentud Arubiano y Johan Hartog, tata di e institucion bibliotecario.

            E recorido a tuma luga den e varios edificionan di e biblioteca durante e añanan, di Lagoenweg te Wilhelminastraat y finalmente George Madurostraat, cada un cu su propio historia y importancia den e desaroyo cultural di Aruba.

            Sra. Britten a resalta e manera cu e institucion a crece, adapta y expande su servicio pa atende e necesidadnan di e comunidad Arubiano.           

Prehistoria di biblioteca, Añanan 1904 – 1949                                                        

            E trabou di biblioteca na Antiya a cuminsa na 1949 cu apertura di e prome biblioteca publico na Aruba. E fecha historico di 20 di augustus 1949 a marca e momento caminda Aruba a haya su prome Biblioteca Publico den kantoor di Gezaghebber.

            Inicialmente conoci como Biblioteca di Gobierno, e establecimento aki a surgi danki na e esfuerso di Departamento di Enseñansa na Corsou, bou  direccion di inspector di enseñansa dr. W.J. Goslinga.

            Diasabra, dia 20 di augustus 1949, pa cinc’or di atardi e apertura oficial di e Sala di Lectura Publico y Biblioteca di Gobierno a tuma luga. Inspector di enseñansa dr. W.J. Goslinga. 

Un centro di cultura nobo na Lagoenweg 11, Añanan 1950 – 1955                                

            Pronto nan ta simplifica e nomber di biblioteca, cu na e momento ey yama oficialmente Biblioteca di Gobierno y Sala di Lectura Publico cambiando e pa Biblioteca Publico, abrevia OLB (Openbare Leeszaal en Boekerij) mescos cu na Hulanda.

            Na 1952, e prome edificio den cual e filiaal di San Nicolas tabata situa tabata na van Speykstraat a muda pa na di dos piso den e edificio di Hulpbestuurskantoor na San Nicolas y desde aña 1989 ta den e edificio na Peter Stuyvesantstraat 16. 

Biblioteca den Wilhelminastraat 6, Añanan 1955 – 1972                                

            Biblioteca na Lagoenweg a crece asina prosperamente cu e edificio despues di un par di aña caba a bira mucho chikito pa e mas cu mil miembro cu a fia e diesseis mil volume cu tabatin den biblioteca mas di cuarenta mil biaha. Poblacion a crece den e añanan ey te pasa cincuenta mil bay te na 55.483 habitante. 

            Na 1965 e filiaal di Santa Cruz a drenta den e cas mas antiguo di Aruba. Loke a sali publica como un noticia chikito den corant, esta cu “e convent di soeur bieu” na Santa Cruz lo keda instala como edificio pa un biblioteca publico tabata otro stap padilanti mas pa trece biblioteca mas cerca di su clientenan.            

            Ta dura un tempo largo, pero finalmente dia 28 di maart 1968 e prome bibliobus ta core riba nos isla. Diputado di Enseñansa, Betico Croes, y Jan H. Beaujon, como miembro di di Conseho di Consulta Cultural di Reino, ta presente ora nan tum’e den servicio oficial. Sticusa a percura pa e compra y e transport cu bapor.

            Cant’i pafo di e bus tin e escudo di Aruba pinta, anto na cada banda di dje algun lema na Papiamento: “Pa placer y distraccion, Bibliobus ta den accion” y “Buki cu tur siguranza, ta aumenta bo siñansa” y “sea anochi o den dia, buki ta bon compania”. 

E biblioteca den Wilhelminastraat, Añanan 1972-1982                                               

            Dia 15 di mei 1972 Johan Hartog, -tata di e institucion bibliotecario na Aruba- a bay cu pensioen despues di 22 aña di servicio. 

E biblioteca den George Madurostraat 13, Añanan 1982 – 1986                      

            Prome di september 1982, seis’or di atardi, ta habri oficialmente e biblioteca nobo den George Madurostraat 13. Despues a sigui un gran cantidad di actividad den henter luna di september. Aruba a haya un biblioteca funcional pa un suma di mas o menos 3,5 miyon florin cu a inclui diferente seccion, manera e seccion di catalogo y mediateca, e seccion di registro legal, e seccion di servicio interno cu su servicio pa adulto y seccion di hubentud, e seccion Arubiana/ Antiyana/ Caribiana y finalmente e seccion di servicio externo, bou di cua mediateca escolar, e trabou di biblioteca particular y e bibliobusnan ta cay.

            E proximo articulo lo contene e resto di e recorido, cu lo enfoca den mas detaye riba e desaroyonan reciente di e Biblioteca Nacional y su rol crucial den e comunidad.