Biblioteca Nacional Aruba ta e 'link' central pa informa e comunidad Arubiano

Directora Astrid Britten:

*Di un biblioteca publico pa un biblioteca nacional

ORANJESTAD (AAN):   Directora di Biblioteca Nacional di Aruba, Sra. Astrid  Britten a concede DIARIO un entrevista exclusivo den cuadro di e celebracion di 75 aña di existencia di e institucion.

            Prome cu bay over na e desaroyonan mas recien, mester enfoca den e añanan cu a marca un trayecto importante pa por a yega na loke biblioteca ta awendia.

            Den un presentacion unda ta haci un recorido relaciona cu e inicio di un biblioteca pa Aruba, Britten ta referi na diferente momento. Esaki ta un otro periodo. Ban yam'e momentum cu a nifica masha hopi pa Biblioteca, esta e cambio di biblioteca publico pa biblioteca nacional.

            Dia 3 di maart 1986 Gobernador F.B. Tromp a batisa Biblioteca Publico Aruba solemnemente cu e nomber nobo di Biblioteca Nacional Aruba. Hunto cu e cambio di nomber a tuma luga un exposicion relaciona cu Status Aparte di Aruba.                          

             E evento historico aki a trece cu ne hopi miembro nobo. A inscribi nada menos cu 500 miembro. E cambio di nomber a trece cu ne algun tarea esencial pa biblioteca.

            Na 1987, a haci apertura oficial di departamento di Arubiana/ Caribiana na George Madurostraat 13. Arubiana tin dos seccion: un cu publico por consulta, pero caminda no ta fia nada y un di dos seccion completamente cera, caminda niun hende no por ni mag drenta, o sea loke Hartog a premira for di hopi tempo caba como e forma precedente di e deposito legal.

            Biblioteca ainda tin e “coleccion valioso” di obranan cu nan a cumpra como obheto anticua y cu awendia ta warda cautelosamente. Ta trata aki di obranan for di siglo diesshete, pero tambe di ehemplarnan unico manera di corant Arubiano El Despertador di e añanan 1934-1935.  Arubiana ta contene tambe e asina yama “Coleccion Johan Hartog”.

            Tin tambe e “Coleccion Ito Tromp” yama asina pasobra cuminsamento di 1986 Ito Tromp a bay cu ne for di Departamento di Cultura ora cu a suspende e instancia di Gobierno Antiyano aki pa motibo di introduccion di Status Aparte.

            Dia 17 di october 2008 departamento di Arubiana/ Caribiana ta muda pa Bachstraat 5, mirando cu e falta di espacio tabata evidente. Te cu awe nan ta situa eynan. 

Automatisacion                                                                                                         

            For di basta tempo caba, for di 1987, a sinti e necesidad di automatisa e registracion di buki y e administracion di miembro, un grupo special encarga cu e proyecto di automatisacion mester a automatisa henter biblioteca den un plaso maximo di cinco aña.

            Fin di aña 1995 Irais Sankatsing-Nava, Susan de Lange a haci un bishita di trabou na Hulanda, cu e meta pa mira con e sistema di automatisacion di Biblioteca Municipal di Utrecht tabata funciona y pa concretisa e ultimo palabracionnan encuanto e sistema di automatisacion cu Dynix Hulanda. E administradornan di sistema Lilian Semeleer y Astrid Britten a bay core stage seis siman na Biblioteca Municipal na Utrecht. Na e mesun biblioteca Michelle Roos (departamento di Catalogo); Judith Ling (Filiaal San Nicolas); Ruth Melendez-Geerman (Departamento di Adulto) y Ludwina Koolman (Departamento di Fia Buki) a sigui un curso di dos siman.

            Na 1996 henter e personal a haya un curso di automatisacion na Enseñansa pa Empleo y na aña 1998 Enseñansa pa Empleo a duna un training interno pa e miembronan di personal cu ta traha na Departamento di Informacion.

            E Proyecto di automatisacion aki ta encera tambe e servicio di Internet, pa e servicio aki BNA a haya hopi cooperacion for di SETAR, cu na october 1997 a haci un donacion di cinco computer, tres pa Oranjestad y dos pa San Nicolas.

Biblioteca Nacional Aruba a celebra 70 aniversario, 20 di augustus 2019                                                       Digitalisacion a transforma trabou di biblioteca den uno dinamico, ta un centro di conocimento, ta aplica innovacion den e trabou y ta adapta esaki na e necesidad di e usuario di awendia, mientras ta preserva e documento.

Digitalisacion na biblioteca ta crucial pa diferente motibo:

1. Mas accesibel; 2. Preserva y conserva;3. Manera di busca y organisa ta mas eficiente; 4. Por comparti recurso y colabora; 5. Miho experencia pa e usuario; 6. Ta sostenibel;   7. Por analisa data miho;

            Dia 7 di maart 2019 a lansa coleccion BNA esaki a coincidi cu aña di celebracion di 70 aña. 

Biblioteca Nacional Aruba celebrando 75 aniversario, 20 di augustus 2024

Dia 28 di september 2023 a lansa coleccion Aruba www.coleccion.aw uzando e plataforma di Internet Archive.

            Pa enfatisa e importancia di lanzamento di Coleccion Aruba, di 8-12 di april 2024, Dutch Caribbean Digital Heritage Week a keda organisa door di Archivo Nacional Aruba, Biblioteca Nacional Aruba y UNOCA, esaki en conexion cu 30 aña di Archivo Nacional Aruba (1 di augustus 2024) y 75 aña di Biblioteca Nacional Aruba (20 di augustus 2024).

Den un siguiente articulo lo trece dilanti parti di e combersacion extenso y interesante cu Directora di BNA, Sra. Astrid Britten.