Biblioteca Nacional Aruba a inaugura un sala nobo: 'Sala Safiro'

Den cuadro di nan 75 aña...

*Un sala masha bunita mes unda por bay sinta, lesa, studia comodamente 

ORANJESTAD (AAN):  Den cuadro di e celebracion di 75 aña di trabao di Biblioteca Nacional Aruba, dia 20 di augustus a haci diferente publicacion manera poesianan, a lansa e logo nobo di biblioteca y tambe a inaugura un sala nobo.

            Yosmar Maduro-Sneek, hefe suplente na biblioteca a splica cu como cu 75 aña ta para pa celebracion di safiro, a scoge pa yama e sala nobo 'Sala Safiro' cu ta parti di e ultimo sala panort den e edificio cu ta e sala di estudio. Esaki a wordo comparti den dos parti.

            Keto bay tin e sala di estudio y band'i dje tin Sala Safiro cual ta un sala masha bunita mes unda por bay sinta, lesa, studia comodamente. Eyden por haya historia di biblioteca den liña di tempo cu ta mustra cu potret e añanan cu a transcuri.

            Tambe tin un screen grandi eynan cu ta pasa videonan aworaki tocante e historia di biblioteca y banda di esey cera conoci cu e personal. Semper tin un novedad den e sala.

            Tin un exposicion cu yama 'Cashi habri' pasobra ta shete cashi habri unda ta pone cuater exposicion. Un cu ta keda permanente cu ta di e directora Sra. Britten. Tin dos mas cu biblioteca ta haci cu si ta cambia cada 4 luna. Tin un cashi mas cu ta keda habri, specialmente pa cualkier organisacion of instancia den comunidad. E espacio ta gratis.

            Aworaki e prome organisacion cu ta participa den e exposicion di Cashi Habri ta Archivo Nacional cu e aña aki a celebra 30 aña di trabao.

            Na December lo bin tres exposicion nobo: un ta di Gabriel Garcia Marquez y e otro ta di '200 aña Oranjestad 1824-2024', banda di e organisacion cu ta sigui, Sra. Maduro-Sneek a indica.

            Tin un otro cashi cu ta semi-permanente ya cu esaki ta esun di biblioteca mes.

            Yosmar a invita publico pa pasa y cera conoci cu Sala Safiro y cu e catalogo pa publico a traves di e dos computernan cu tin disponibel den e sala y otro tres cu tin disponibel den e Seccion Publico.

            Ta bon pa agrega cu Sra. Yosmar Maduro-Sneek ta ocupa actualmente e funcion di directora suplente na Biblioteca Nacional Aruba. El a cuminsa traha cu gobierno na 1988 despues di a caba di studia na Hulanda na 1987 unda el a studia pa Bibliotecaria cu specialisacion den Biblioteca Publico (Openbare Bibliotheken).

            El a traha na Corte como bibliotecaria, semper cu e pensamento di bay traha na Biblioteca Publico. Na 2004 el cuminsa traha na Biblioteca Nacional di Aruba caminda el a traha como hefe di e sala di estudio, haciendo trabao como bibliotecaria, den catalogo, videonan, entre otro y tambe den e parti di 'beleid en advies'.

            Actualmente e ta hefe di Departamento Publico. Banda di esey e ta traha den diferente proyecto. Desde 2022 tambe e ta directora suplente, hunto cu Sra. Astrid Britten y Sra. Lilian Semeleer.