_large.jpg)
Jayburtt Dijkhoff, director di SIKI:
ORANJESTAD (AAN) – Dr. Jayburtt Dijkhoff, director di SIKI, den e conferencia di prensa relaciona cu e curso cu el a lansa recientemente, hunto cu Sindicato TOPA, y cu ta titula “Con pa goberna un pais”, a toca tambe e tema di finansanan publico y situacion economico di Aruba.
Dijkhoff a bisa cu e situacion financiero-economico ta sumamente precario y tin varios rapport ta bisa esey.
Den e investigacion cu el a haci, a tuma nota di e rapport di Algemene Rekenkamer, Raad van Advies, veredictonan di hues cu ta sentencia ex-ministernan pa soborno, y maluso di poder.
“Esaki ta un punto cu e situacion financiero-economico ta refleha casi un ehemplo bibo di e problemanan, e fayonan den nos sistema. Fayonan hopi grandi, integral, cu nos tin cu traha riba dje”, Dr. Jayburtt Dijkhoff a señala.
El a repasa un rato e ultimo y mas reciente rapport di Algemene Rekenkamer, cu ta bisa cosnan masha importante. “E ta bisa cu ningun gabinete a logra yega na solucionnan structural y tuma medidanan necesario. Esey kiermen cu, basicamente, nos no por keda haci mescos. E ta bisa tambe cu basicamente, no tin control mas riba nos situacion financiero-economico y cu mester bin un cambio, completamente, di henter e maneho di nos pais. E ta sumamente importante, pasobra si nos no haci esey, nos pueblo den futuro cercano”, el a vocifera.
Dr. Dijkhoff a enfatiza bisando cu e importancia di e curso aki ta pa siña con por cambia henter e situacion aki, pa nos por tin un sociedad berdaderamente husto.
“Tambe nos ta bay wak con nos a copia na aña 1986, cu Status Aparte, varios punto di e Constitucion di Hulanda, pa nos tin nos propio Constitucion y nos propio Autonomia. Un di nan ta cu enberdad nos tin un Parlamento, di 21 persona cu ta representa nos pais, nos tin un Gabinete di Ministerionan cu ta traha pa sirbi pueblo, y nos tin Derechonan Humano, hancra den nos Constitucion”, Jayburtt Dijkhoff a relata.
