Barco Hulandes un biaha mas a bolbe intercepta hopi droga riba lama

ORANJESTAD (AAN): E barco di Marina Hulandes Zr.Ms. Groningen pa di cuater biaha a intercepta den un tempo cortico un transporte di droga.

Den Lama Caribe e barco patruyero a sa di pone cu un Speedboat tipo ‘go fast’ mester a stop, esaki tabatin na bordo 4 persona. E barco a intercepta den e accion aki, mas cu 3.000 kilo di cocaina. E captura tabata riba 31 di mei, pero a keda anuncia te Diahuebs 27 di Juni.

   Den marduga di Diahuebs 30 pa bay Diabierna 31 di Mei, e avion patruyero Dash-8 y Wardacosta di Caribe Hulandes a capta un boto di droga go-fast den Lama Caribe cerca di islanan ABC. Zr.Ms. Groningen na e momentonan ey ya caba tabata den cercania y a drenta accion mes ora.

   E barco di Marina a cuminza persigui cu yudansa di su dos navenan di intersepcion rapido FRISC. Riba e navenan di intersepcion aki tabatin ‘Fleet Marine Squadron’ y Wardacosta Mericano.

   Despues di un persecusion, sosteni pa e Dash-8, e avion patruyero, tabata posibel pa intercepta e boto yena cu droga aki. E cuater contrabandistanan ademas di e 3.000 kilo di cocaina cu a keda confisca, a ser pasa pa US Coast Guard.

   Mas droga confisca: Durante e accion anti-droga di Zr.Ms. Groningen di 4 di Juni cu a pasa, e barco patruyero den cooperacion cu e nave di sosten Zr.Ms Pelicaan tambe a confisca droga.

   E barconan di Marina hunto a saca tanto paketenan di marihuana como tambe paketenan di cocaina for di lama. Tambe e droganan aki a keda confisca y pasa pa Wardacosta Mericano. E droga a keda destrui.

   Barco Patruyero: Cu e dos intersepshonnan aki e conteo a yega un biaha mas pa Zr.Ms Groningen riba 5 transporte di droga desde su presencia, for di cuminzamento di April 2024, den Region Caribe.

   E barco entre otro ta keda desplega pa operacionnan contra transporte ilegal di droga. Esaki ta socede intercambiando den coperashon cu US Coast Guard y Wardacosta di Caribe Hulandes.