Banco Central a dicidi pa baha e tasa di reserva obligatorio na 21,5 porciento 

Entrante 1 di april 2024,

ORANJESTAD (AAN):  Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 22 di maart 2024, CMM a dicidi pa reduci e tasa di e reserva obligatorio di 22,0 porciento na 21,5 porciento entrante 1 di april 2024.

            Di e manera aki, e banconan comercial mester tene un balansa minimo na BCA cu ta igual na 21,5 porciento di e depositonan riba termino cortico[1] di nan clientenan. E decision pa baha e tasa di reserva obligatorio ta basa riba e reservanan oficial cu a expande y ta adecua segun e metrico ‘Assessing Reserve Adequacy’ (ARA) di e Fondo Monetario Internacional (FMI) monitorea pa BCA. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario. 

E CMM a considera e siguiente informacion y analisis den su deliberacion. 

Reservanan internacional y oficial

            E reservanan internacional, cu ta consisti di reservanan oficial di BCA y reservanan di divisa na e banconan comercial, a subi cu Afl. 144,9 miyon te cu 1 di maart 2024, compara cu december 29, 2023 (Grafico 1). E reservanan oficial a expande cu Afl. 145,2 miyon, mientras cu e reservanan na banconan comercial a baha levemente cu Afl. 0,2 miyon. Consecuentemente, te cu 1 di maart 2024, e reservanan oficial y internacional a suma Afl. 2.790,8 miyon y Afl. 3.206,9 miyon, respectivamente.

            Sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, reservanan internacional a keda ampliamente riba e rekisito di tres luna di pago riba e cuenta coriente di e balansa di pago te cu 1 di maart 2024. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ARA di FMI (Tabel 1). 

Inflacion

            Inflacion, midi na final di luna contra e mesun luna di e aña anterior, a yega 1,5 porciento na januari 2024, cayendo for di 2,3 na december 2023 (Grafico 2). E contribuyentenan principal na e inflacion, midi na final di luna contra e mesun luna di e aña anterior, na januari 2024, tabata ‘comunicacion’ (contribuyendo cu 1,5 punto di porcentahe), ‘diferente producto y servicio’ (contribuyendo cu 0,3 punto di porcentahe), y ‘cuminda y bebida no alcoholico’ (contribuyendo cu +0,3 punto di porcentahe). Di otro banda, e componente ‘transporte’ (contribuyendo cu -1,1  punto di porcentahe) a mitiga e inflacion den januari 2024.

            E inflacion midi riba promedio di 12 luna a baha pa 2,9 porciento na januari 2024; un caida compara cu 3,4 porciento na december 2023. E presion inflacionario tabata mas tanto debi na e subida den e tarifa di awa y coriente desde augustus 2022 y e aumento den prijs di cuminda y bebida no alcoholico. Ademas, Aruba a importa un gran parti di e crecemento den prijs for di su partnernan comercial, particularmente Estados Unidos y Europa.

            Mientrastanto, na januari 2024, inflacion basico (cu ta exclui cuminda y energia) a alcansa 2,1 porciento si midi e final di respectivo luna contra e mes un luna di e aña anterior. Basa riba un promedio di e ultimo 12 lunanan, inflacion basico a yega na 2,0 porciento. 

Likides excesivo di e banconan comercial

            Likides excesivo di e banconan comercial (incluyendo credito cu no a wordo aloca ainda y otro compromisonan) tabata Afl. 409,3 miyon na fin di januari 2024, esta, Afl. 35,2 miyon mas compara cu december 2023 (Grafico 3). E subida aki ta refleha e rendimiento di e sector di turismo. Ademas, data preliminario ta mustra cu likides excesivo a subi cu Afl. 152,9 miyon den e siman cu a termina riba 23 di februari 2024, compara cu fin di december 2023.