‘Ban Bek Caya’ tabata un exito rotundo

Hopi tempo sin mira Caya Betico Croes asina yen

ORANJESTAD (AAN): Diabierna anochi, Caya Betico Croes na Playa, conoci pa hopi hende como “Caya Grandi”, a bira e epicentro di alegria cu union familiar y bida cultural durante e prome edicion di Ban back Caya, un evento cu a sobrepasa tur expectativa y a lansa un sentimento di speranza y renobacion pa nos caya principal.

   Un multitud grandi di hende, tanto local como turista, a yega pa disfruta di un anochi yena di alegria, cultura, entretenimento y compras na prijsnan special. Caya Grandi a haya bida manera den su tempo di gloria, cu famianan disfrutando, gozando y compartiendo momentonan hunto.

   E ambiente tabata vibrante, tiendanan tabata yen, ambiente tabata reina den cada skina, y bendedornan y comerciantenan den caya a logra un anochi comercial exitoso despues di hopi tempo. Tabatin un aire fresco den Caya Betico Croes y comercio local a haya un empuhe nobo, y nos comunidad a mustra cu caya principal tin derecho di existencia.

   Ban Bek Caya no solamente a trece bida back den un area comercial importante, pero tambe a uni hende riba un manera positivo y inspirado. E evento a demostra cu si traha hunto, por logra cosnan grandi.

  Cu hopi orguyo, Gobierno di Aruba por bisa cu e prome edicion di Ban Bek Caya tabata un exito rotundo, y ta ancioso pa e proximo edicion.