*Ta recomenda pa introduci un cuadro di gasto multi-anual - ORANJESTAD (AAN): Durante un reunion diabierna cu Formador di Gobierno, Evelyn Wever-Croes cu e representante di SVb y AZV, Edwin Jacobs, el a duna di conoce
cu di parti di AZV ta recomenda riba termino cortico pa sigui den e cuadro di e landspakket cu e modelo cu AZV a formula hunto cu Ministerio di Salud Publico, cu algun modificacion, pa por yega na e condicionnan cu ta poni pa Aruba, cu ta entre otro 60 miyon florin den sector di cuido.
Pa termino medio y largo mester bin cambionan structural na tres nivel. Primeramente ta recomenda pa fortifica e rol di e ministernan di salud publico y finansas den e proceso di presupuesto.
Ta recomenda pa introduci un asina yama cuadro di gasto multi-anual den cual por trece claridad a termino medio y por trece stabilidad tambe y trankilidad. Ademas ta un medio pa contene e crecimento di e gastonan, Jacobs a remarca.
Den cuadro di 4 pa 5 aña ta kere sigur cu lo duna un contribucion pa por controla mas e crecimento di gastonan den e sector di cuido, a agrega.
Den e siguiente nivel ta necesario pa trece claridad den e instancia cu ta encarga pa cu structuracion y direccion den sector di cuido.
Aworaki AZV ta hunga e rol aki, pero no tin un claridad y AZV no ta ekipa cu e instrumentonan legal pa haci esaki tambe. E ley di AZV ta duna cierto espacio, pero ta kere cu mester bin un claridad pasobra tin necesidad di esaki, Jacobs a agrega.
Banda di esey, tambe ta kere cu ta necesario pa formula un vision pa termino medio y largo riba con ta bay structura sector di cuido medico, ki servicionan ta bay ofrece, pero saliendo for di e proyeccion cu tin riba kico e demanda di cuido ta bay ta y no e ambicion, pero e necesidad di e comunidad, finalmente Edwin Jacobs, den su funcion di director interino di AZV a declara.
