Presidente di FTA, Hose Figaroa:
ORANJESTAD (AAN)-- Presidente di e Federacion di Trahadornan di Aruba (FTA), mr. Hose Figaroa, den entrevista cu Matutino DIARIO a indica, cu e problemanan social den nos comunidad ainda tey, no obstante cu aworaki tin mas placa cu nunca antes.
Figaroa a bisa cu door cu tin un grupo grandi cu no tin e situacion aki pero tin un grupo chikito cu ta keda den situacionnan fastioso y cu hopi biaha no t’asina bisto.
Figaroa a expresa cu e situacion di un pais no por wordo asocia na con bo ta trata esnan cu tin e miho sino con bo trata esnan cu tin e mas dificil.
“Eynan bo ta midi si bo ta exitoso den loke bo ta haci. Pues, no ta pasobra e grupo ey no ta un grupo grandi bo no por dedica tempo na e grupo aki, door cu ta importante con bo ta trata esnan cu di berdad tin e necesidad ey”, segun e lider di FTA Hose Figaroa.
El a señala cu no ta solamente e situacion social riba su mes, pero como resultado di e situacion mental cu e personanan tin. “Nos tin un problema grandi aki na Aruba, no solamente pa loke ta cuido medico pero tambe pa cuido psicologico, unda cu tin personanan cu problemanan cu ta wordo crea door di un situacion social fastioso na cual no ta dedica tempo ni recursonan na e grupo ey, loke ta ta haci cu e problemanan ta cuminza chikito y, eventualmente, ta bira grandi den comunidad”, Hose Figaroa a trece dilanti.
El a agrega cu aworaki, por ehemplo, cu tin fondonan disponibel, eynan ta un di e camindanan cu e ta kere ta hopi importante como gobierno, pa dedica suficiente tempo y placa tambe, pa deal cu e problemanan aki y no warda pa nan bira grandi, sino cuminza na e origen di e situacion pa evita p’e bira grandi.
