Director Carlos Martinez satisfecho:
- Di 40 pa 50 alumno di nivel 1, 2 y 3 lo haya nan diploma
ORANJESTAD (AAN): Carlos Martinus, director di Openbaar Avond Beroepsonderwijs Aruba (OABA), den entrevista cu DIARIO, a declara cu e aña escolar 2025-2026 a bay hopi bon.
El a bisa cu enberdad e scol tabata tin menos alumno pasobra na final di aña nan no a duna hopi publicidad.
“Pero nos ta cabando e aña aki, y nos ta premira cu nos ta cabando cu 40 pa 50 alumno cu ta haya nan diploma den nivel 1, 2, 3,” el a declara.
“Pa mi e aña aki ta primicia. Nos a cuminza cu nivel 3 tambe, y e aña ta bayendo hopi bon. Y e motibo cu nos ta akinan ta pasobra otro aña nos kier bira miho ainda, y nos ta creciendo dia pa dia”, Director Carlos Martinus a señala.
El a splica cu den temporada anterior nan tabata tin scarcedad di personal pero aworaki nan a haya hende bek y nan por haci relacionnan publico, y dedica tempo. “E doelgroep di nos aki ta importante cu bo ta duna nan atencion, pasobra si no duna nan atencion, bo ta perde nan. Anto, esey ta e power di OABA; mi coleganan ta haci hopi fuera di scol, banda di scol pa nan, pa mustra nan cu nan ta importante”, señor Martinus a acentua.
El a agrega cu no mester lubida cu e nivel 1 cu 2, hopi biaha ta alumnonan cu di un manera of otro a haya nan mes den problemanan y no a termina nan scol anterior.
“Y cerca nos, nos kier duna tur hende un chens pa nan por haya nan diploma, nos kier traha nan futuro, nos ta den enseñanza y nos kier duna nan oportunidad pa trabao. Nos ta dunando hopi alumno cu ta bin cerca nos, cu ta traha den diferente supermercado yenando saco pa cliente, cu ta un trabao cu tin balor, pero mi kier pa nan bira un electricista, un metsla, un monteur. Kico nos ta haci? Nos ta purbando di pone tur den un bedrijf”, Director Carlos Martinus a indica.
