Awe ta cuminza transmision di documentarionan hopi interesante di FADA

ORANJESTAD (AAN): FADA Diamars mainta durante un conferencia di prensa a anuncia cu e ta lanza su di tres temporada di documentarionan basa riba bida real.

Rubiella Toppenberg a splica cu e proposito di e documentarionan ta pa comunidad completo ta na altura di origen y factornan cu por conduci na pone un persona haci uso di cualkier substancia legal (alcohol) of ilegal (droga).

“Esaki ta e di tres temporada y durante e temporadanan anterior nos a ricibi hopi bon comentario, mientras cu hopi persona a acerca FADA pa cu e documentarionan aki”.

E proyecto aki tabata tin un bon acogida y pesey mes nos a sigui traha pa haci esaki posibel tur aña, segun Toppenberg.

El a indica cu e aña aki ta bay tin storianan cu ta ‘touch’ bo na un manera increibel y sigur storianan cu lo siña bo compronde e ser humano un tiki mas mihor.

“Hopi biaha ta hopi facil pa nos huzga, sin compronde eingelijk pakico un persona ta tuma e decision pa haci uso di cierto substancia legal of ilegal”, segun Toppenberg.

El a splica cu e temporada aki tin 7 storia cu ta bay duna hende mas conocimento riba adiccion y rehabilitacion, unda cu bo lo mira tambe e diferencia entre adiccion largo y adiccion cortico, unda cu por ehempel pa 9 luna largo adiccion tin bida di un persona den su gara y ta cambia e persona drasticamente.

E documentarionan ta bay enfoca tambe riba adiccion na remedinan prescribi.

No ta wordo papia hopi riba esaki, pero na Aruba tambe tin hopi persona cu ta adicto na remedinan prescribi, manera por ehempel remedinan pa drumi.

Toppenberg a trece dilanti tambe cu lo papia tambe riba salud mental, unda cu un di e documentarionan ta bay contene un storia hopi interesante riba esaki.

“E ta hopi importante tambe pa nos hobennan, pasobra salud mental ta algo cu hopi biaha ta conecta cu adiccion”.

Un di e storianan interesante tambe cu lo bin dilanti ta bida di un adicto ambulante, segun e trahador preventivo di FADA, kende a sigui bisa cu dos adictonan ambulante ta bay conta di nan añanan como adicto riba caya.

Un di nan dentro di poco lo subi avion pa busca rehabilitacion den exterior.

Entrante awe e documentarionan lo pasa na television y riba diferente medio, incluyendo e pagina di Facebook di FADA.

E episodionan ta bay ta tur Diaranzon pa 9’or di anochi, unda cu e ultimo episodio ta bay ta riba 20 di October.