Awe ta celebra Aña Nobo Chines

ORANJESTAD (AAN)- Awe 1 di Februari 2022 ta cuminza e aña nobo Chines, e aña di tiger di awa. Esaki ta un di e actividadnan mas importante y tradicional di mundo.

Tambe e ta conoci pa e Fiesta di Primavera of Aña Nobo lunar. Y e ta hopi importante y ta existi numeroso supersticionnan y creencianan vinculo cu e celebracion aki pa e poblacion di china y otro paisnan di continente asiatico.

  Aña Nobo chines no tur aña ta cay riba e mesun fecha, pero semper ta entre 21 di Januari y 20 di Februari. E fecha di e celebracion aki ta marca pa e calendario lunar chines.

 E aña di tiger di awa 2022 ta cuminza awe 1 di Februari te cu 23 di Januari 2023. Prediccionnan pa e personanan cu a nace bao e signo aki den e añanan, 1914, 1926, 1938, 1950, 1962, 1974, 1986, 1998, 2010 y 2022 ta indica cu e aña 2022 lo ta un bon aña. E tiger ta worde consider na China como un animal cu ta spanta e mala suerte, e personanan naci bao e signo aki ta destaca pa nan balentia y bon actitud pa desafia e retonan cu ta  presenta, nan ta personanan amable, aunque un poco precipita na momento di tuma decisionnan. Den amor nan ta conoci pa ta personanan hopi friu, pero ta disfruta di musica y arte.

Ya for di ayera e colonia chines aki na Aruba a cuminza celebra, unda por a mira y tende un gran cantidad di tiramento di vuurwerk. Un Feliz Aña Nobo, na henter e colonia Chines residencia aki na Aruba.

   Riba e potret por mira e.o. e cuminda cu tradicionalmente ta wordo sirbi riba Aña Nobo Chines.  Ta costumber di regala hende fruta di Mandarin tambe.