Diariamente retonan nobo ta nace pa e generacion nobo
*Enseñansa ta decisivo pa e calidad di comunidad di mañan
*E formacion di cada mucha lo sigui skirbi historia di un pais
ORANJESTAD (AAN) — Un aña escolar nobo mester ta motibo di reflexion pasobra e ta mucho mas cu e mensahe cu vacacion a yega na su fin.
Durante vacacion bida normal ta wordo interumpi pa un momento di descanso pero tambe di clausura di loke ta tras di lomba y apertura di loke ta spera.
Central den e apertura di un aña escolar nobo, ta e mucha cu ta dal otro paso riba e ruta cu e mester sigui den bida y lo ta decisivo pa e ruta cu Aruba lo sigui den futuro.
Ora para keto na e importancia di e momento cu portanan ta habri pa e mucha drenta e localidad den cual e lo pasa un gran parti di dia, ta realisa con gota pa gota e mucha ta ricibi un dosis di formacion pa su mes y pa su comunidad.
E criatura, cu mester lanta mainta tempran pa bay school, ta ricibi e preparacion necesario pa un dia e por sirbi su comunidad y dicidi pa su pais.
For di momento cu e mucha mester lanta di su cama pa bay school, e ta wordo splica cu accionnan, cu e tin un deber enfrente su pais, cu mester di hende prepara riba tur tereno y na tur nivel pa por funciona.
E sentido di responsabilidad ta wordo entrega na e mucha, cu mester comprende cu e ta hunga un papel importante den comunidad cu ta depende di su persona.
E mucha ta wordo alimenta cu e pensamento cu e proceso escolar ta su formacion pa acepta e tareanan cu e mester desplega como ciudadano activo den su comunidad.
Entrada di un aña escolar nobo, ta e porta cu ta habri pa un futuro desconoci, yena cu retonan cu ta aumenta pa e mucha den e comunidad mundial moderno.
Mañan ta resultado di awe, cu ta resultado di ayera. E desaroyo di hende ta mara na e evolucion di un comunidad, cu mester haya contesta pa preguntanan nobo of preguntanan cu nunca hende kier a contesta y a flota den aire.
E mucha un dia mester busca solucion pa problemanan cu tempo a crea y a entrega pa futuro sin splicacion sikiera.
Ciencia ta avansa. Kico ta e base di e mucha pa e por ta parti di avance? E lo comprende kico ta progreso, cu no solamente ta sconde den material pero na prome lugar den e calidad di hende?
Cada grupo den comunidad, a entrega na e hoben cu ta drenta edificio di school awe, un tarea. Busca solucion pa situacionnan cu te awe hende no a logra haya.
Un hende den formacion ta e descripcion di e mucha, cu ta bay school pa prepara su mes pa e responsabilidad cu mundo lo pone den su man na cas y pafor di cas.
Sabiduria y formacion di concenshi mester yuda e mucha scoge e pakete cu lo nifica e progreso di su pais y di hende den futuro.
E sabiduria di buki mester wordo complimenta cu e formacion di un concenshi cu ta permiti e mucha un dia dicidi riba e diferencia entre bon y malo, loke e mester pone den practica den su bida diario y den sirbishi di su comunidad.
Enseñansa ta decisivo pa un comunidad y ta motibo pa cual na paisnan cu no conoce democracia, dictadornan ta percura pa schoolnan yena muchanan cu conceptonan cu ta haci cu un dia como adulto, e lo mata si bisa cu e mester mata.
Nos ta biba den un mundo, cu durante e ultimo siglo a entrega hende sabiduria, pero tambe e realidad amargo pero creciente di violencia, di corupcion, di perdida di balor.
E aña escolar nobo lo mester duna e mucha splicacion riba tereno di matematica entre otro. Pero e mester duna mucha tambe e conocemento con mester uza sabiduria pa bienestar di un comunidad y henter humanidad.
E maestro lo prepara e mucha pa dirigi futuro di e pais a base di conocemento di buki y moral cu mester uni na sirbishi di e pais.
Schoolnan despues di vacacion ta habri nan porta. Na momento cu nan porta habri, porta di futuro di Aruba y di mundo tambe ta habri pa bon of pa malo di e mucha, dependiente di e formacion diario di ciencia uni na moral, cu e lo ricibi den palabra y hechos!
