SANTO DOMINGO: Awacero torencial di varios ora largo a cay e anochi di Diabierna pa Diasabra,
debi na un Ola Tropical basta activo cu pasa riba Republica Dominicana, incluyendo e capital di Santo Domingo.
Un di e victimanan di e awacero aki a bira e señora Altagracia Sánchez, como cu su cas a yena cu awa, y coriente fuerte a daña tur e placa di papel di 12 mil Pesos Dominicano (como 407 Florin) cu e tabatin warda ta spaar pa pronto haci test di curazon na Hospital.
Mesora tur hende den e bario di Los Rios na Santo Domingo a haya sa di loke a pasa, y nan por a sinti e angustia y preocupacion di e señora pa cu su testnan. Pasobra tres biaha caba el a pospone e testnan aki, pasobra e no tabatin suficiente placa pa paga pa nan.
Señora Altagracia tin 65 aña di edad, y ta sufri di curazon, pero ainda e no sa exactamente kico e tin, y pesey e tabatin planea pa Diaranson awor haci algun test. Pero awa a bay cu tur cos! Hasta e carta di Docter cu orden pa haci e test, a wordo destrui.
Varios aparato den su cas cu ta yude hala rosea mihor, tambe a keda destrui.
Segun Altagracia a bisa, e placa el a spaar den tres luna. Ora cu el a nota cu el a yega e suma suficiente pa paga pa e test, el a hinca tur e placa den un mea, y a warde den un lachi unda e tabatin un folder cu e papelnan di Docter poni tambe.
E 12 mil Pesos cu a desaparece, no ta e unico preocupacion di Altagracia, pasobra tur su aparatonan electrico y demas pertenencia awor no ta funciona mas debi na e caos di Diabierna anochi.
Awacero pisa di Diabierna anochi na Republica Dominicana, a laga un saldo di por lo menos cuatro morto, y inundacionnan a soprende publico, pasobra nan no a spera cu e nivel di awacero ta asina hopi.
