ORANJESTAD (AAN): E siman aki e gruponan cu ta lucha pa elimina Abuso di Muchanan, entre otro Grupo Ta Basta, a expresa nan sorpresa con autoridad
a descubri tres mucha chikito cu lo a ser haya ta biba den condicion espantoso cerca nan mama, y a bati alarma pasobra nan ta pensa cu Voogdijraad na Aruba no ta yudando na proteha e muchanan como debe ser.
Mientras tanto Diahuebs atardi, Bureau Sostenemi a emiti un boletin di prensa pa duna detaye di e caso aki.
Nan a nota tambe con varios persona a cuminza expresa nan preocupacion pa e tres muchanan chikito aki cu ta biba cu nan mama y su pareha nobo.
Den ultimo dianan aki, tanto Polis y Voogdijraad a brinda 2 asistencia riba e asunto aki. Aworaki Bureau Sostenemi tambe ta haciendo un investigacion riba e situacion di e muchanan. Nan a tene hopi contacto cu tur miembro di famia, e wela di e muchanan, y tambe e scol unda e muchanan ta bishita.
Tin preguntanan importante cu tin di bay haya contesta pa asina por haya un bon idea di loke tin mester pa trece un bon futuro pa e muchanan aki. Pa por contesta e preguntanan aki, ta necesario di haci investigacion y esey ta bay dura algun tempo.
Pero riba Diahuebs tabatin reunion entre Cuerpo Policial, Voogdijraad, Bureau Slachtofferhulp, Departamento di Asuntonan Social, y Bureau Sostenemi. Den e reunion aki, e organizacionnan a informa otro hopi bon, y a palabra cu tur paso cu nan lo bay tuma despues lo bay acompaña cu consulta adecuado. E preocupacion di ultimo dianan ta dañino pa e muchanan y un bon cooperacion por yuda preveni e preocupacion aki.
Segun Bureau Sostenemi, nan ta compronde e preocupacion di pueblo pa e tres muchanan aki. Pesey nan a palabra pa bay duna informacion lo mihor posible na e hendenan preocupa riba loke nan ta haci. E personal di Bureau Sostenemi ta trahando duro riba e situacion di e muchanan aki. Nan ta pidi pueblo pa mantene calmo. Ban laga e empleadonan haci nan trabao. E seguridad di e muchanan ta nan prome prioridad. Pesey nan lo bay bin cu un plan di seguridad.
Manera ta conoci, Bureau Sostenami ta encarga cu e Meldpunt Nacional na Aruba.
Mas detaye no a ser duna. E Grupo Ta Basta tambe tabatin un conferencia di prensa prepara pa Diahuebs atardi dilanti Voogdijraad pa expresa nan disgusto pa e forma cu e caso di e tres muchanan aki a wordo atendi. Nan ta contento cu Polis a saca e 3 muchanan di e lugar deteriora cu nan a saca nan, pero a keda asombra cu Voogdijraad a debolbe e muchanan toch bek.
