Autor Denise de Jongh a presenta su buki nobo “Yanchi Golos”

Diabierna 1 di November, e escritor y editor Denise de Jongh Rekwest a lanza su buki nobo “Yanchi Golos”,

di cual el a entrega un ehemplar, Dialuna cu a pasa, na Biblioteca Nacional Aruba, en conexion cu Festival di Buki di Mucha.

E buki pa e Siman di Buki di Mucha ta “Dushi Cabesura!” y Denise a skirbi un buki unda Yanchi ta hopi cabesura. Denis a splica cu e ta trece hopi enseñanza pa e muchanan y nan ta cabesura mescos cu hende grandi, pero e mucha mester siña cu esaki ta trece cierto consecuencianan cu ne, y cu nan mester ta responsable pa e cabesura cu nan ta haci. Esaki ta hopi importante, y den e cuenta aki e ta bin hopi fuerte dilanti, segun e autora a comenta.

E buki a wordo lanza na Party by Gift & Dyon, y Denise ta hopi gradici cu Meneer Croes, propietario, cu a habri su portanan pa e evento aki tuma lugar.

Esaki tabata e lugar perfecto ya cu Yanchi a bay un fiesta, unda nan a parti bolo cu Yanchi gusta masha.

Dos mucha di cada scol di SKOA y DPS a haya invitacion pa e presentacion di e buki, cu a haya bendicion door di Pader Jose. E buki ta pa mucha den edad di 5-8 aña. E buki a wordo parti den tur scol basico y tambe lo wordo parti entre e muchanan di Imelda Hof y Traimerdia.

Denise a gradici su sponsor ya di hopi tempo caba Divi Impact Foundation, y tambe na Madrina di e buki Mirna van der Linde y Padrino Ricardo Vrolijk.

Seccion Hubentud den Movecion ta desea e autor Denise de Jongh, hopi exito cu su buki y cu tur e “yanchinan golos” y “Dushi cabesuranan” siña hopi di ambos buki, y cu e Festival di Buki pa Mucha resulta un bez mas, den un exito grandioso.