Autentico Aruba Culinary Festival ta cuminza cia cu competencia entre studiantenan di EPI y EPB

Na October venidero

Tambe lo tin Iron Chef Competition 

ORANJESTAD (AAN): Aruba Tourism Authority (A.T.A.) como parti di e “Autentico Aruba Culinary Festival” a presenta un competencia culinario entre studiantenan di EPB y EPI na EPB Oranjestad. Un competencia cu a provee studiantenan e oportunidad pa traha di cerca cu chefnan profesional y pa experiencia e presion di un competencia culinario den bida real. Un total di seis studiante a worde selecta pa asisti tres chef local durante e competencia di Iron Chef 2024, dia 13 di oktober na The Pavilion den Wilhelminastraat.

   E huradonan di e competencia tabata Chef Juan Ludeña di Papilon Restaurant, Chef de Cuisine Jeanclaude Werleman di Infini Aruba, y Sous Chef Moises Ramirez di Lima Bistro. Nan a fungi como hurado durante di e competencia entre studiantenan na EPB Hato. Esakinan ta e tres chefnan local cu porcierto lo ta esnan competiendo durante di Iron Chef 2024.

   Despues cu e studiantenan a presenta tres serie di cuminda, e momento final a yega pa scoge e seis studiantenan cu lo bay asisti durante di Iron Chef 2024. Ganadornan a keda den nomber di Micheal Padron, Kahlil Mullers, Shandon Helder, Jayden Heyden, Dylan Cardona, Annie Ortega. Nos ta ansioso pa mira nan asistencia riba e podio principal durante di “Autentico Aruba Culinary Festival”, un combinacion di studiante di EPB y EPI.

   E invitacion ta keda na e comunidad di Aruba pa bin presencia The Pavilion den Wilhelminastraat dia 12 y 13 di oktober den e area historico di Wilhelminastraat den centro di Oranjestad. Bishitantenan di e festival lo bay gosa di Aruba su producto culinario cu ta uno diverso. E festival ta un celebracion di e producto culinario varia di e isla, cu a ser crea y inspira pa entre otro chefnan local. Cu pasion pa gastronomia, e local como e bishitante di e isla lo tin e oportunidad pa descubri diferente restorant y sabornan nobo durante e siman di evento.

   Calendario: Autentico Restaurant Week lo tuma lugar entre 7 cu 11 di oktober. Durante e prome parti di e siman, diferente restorant participante lo presenta menu special, descuento, of organiza nan propio evento culinario.

   Dia 12 di oktober, lo percura pa un escena culinario diverso durante di e The Pavilion den Wilhelminastraat. Riba e dia aki tambe lo por presencia e competencia di Bartender’s Brawl.

   Dia 13 di oktober, lo percura pa un escena culinario diverso durante di e The Pavilion den Wilhelminastraat. Alavez, lo bay presencia tres chefnan local cu lo bay competi den Iron Chef 2024 riba e podio principal. Caminda cu cada chef lo worde asisti pa studiantenan culinario di EPI y EPB, demostrando nan abilidad bou di presion.