Setty Christiaans-Yarzagaray di MEP:
ORANJESTAD (AAN)—Den su presentacion pa e Comision Fiho di Turismo, presidi pa Parlamentario Setty Christiaans-Yarzagaray, ATA a bisa tambe cu un desaroyo despues di Covid ta, cu casi no ta existi “business travel” mas, cu ta un componente hopi importante pa ATA y pa Aruba, y mirando e hecho cu hopi hende a descubri e mundo virtual, a haci cu awo e negoshi di viahe cay na un forma bastante significante, y e no a peak up ainda na e forma cu e tabata prome y enfoca nan mes un tiki mas riba “leisure travel” (turismo di placer) mirando e hecho cu e “business travel” ta, practicamente, no presente.
Sinembargo, e parlamentario ta splica, den e mundo di turismo di placer tin, mundialmente, hopi mas competencia, y esaki ta haci hopi mas dificil, pasobra un post so tin y tur hende kier “peak in” den esaki. ATA tambe a indica un maneho riba e metanan aki cu ta mas dirigi riba turistanan afluente, cu tambe ta haci e post di turistanan mas chikito y asina haciendo e trabao un tiki mas dificil.
ASPECTO FINANCIERO:
Christiaans- Yarzagaray a indica tambe cu ATA a presenta su parti financiero na e Comision Fiho di Turismo y e retonan cu ta bay tin, mirando e fluctuacion di turismo.
Locual ATA a trece dilanti tambe ta e parti di riesgo cu ta e reforma fiscal cu ta biniendo, mirando e hecho cu e por afecta, pasobra ATA tambe ta un punto di discusion den e reforma fiscal aki.
“Pues, naturalmente nos turismo cu nos ta depende di dje ta keda depende di e desaroyonan di e pandemia, pero nos kier a gradici ATA pa tur e informacion brinda, y durante e dianan cu ta bin, nos lo zorg pa informa pueblo mas tambe di e informacionnan cu a ser brinda na nos, durante e reunion aki”, Parlamentario Setty Christiaans-Yarzagaray a conclui.
