ATA a introduci ideanan nobo pa 2025

ORANJESTAD (AAN): Diaranson merdia, durante un reunion, Minister Dangui Oduber hunto cu e board di Aruba Tourism Authority (ATA)

a ricibi un presentacion unda a presenta estrategia di mercadeo inovativo pa Aruba pa aña 2025. E presentacion aki, duna door ATA, den colaboracion cu Deep Focus Agency y Zeno Group, a introduci e marcadeo di estrategia pa branding y communication pa e aña venidero.

   E campaña di mercadeo “The Aruba Effect” a worde lansa na aña 2022, cu su enfoke pa haci e invitadonan sinti alegria y contento ora nan pensa y bishita Aruba. Awo ta tempo pa sigui evoluciona e estrategia di mercadeo. Aña cu ta bin aki, e campaña nobo ta bay mas leu ainda.  E lema “Feel it, Want it, Get it, Protect it” a worde enfatisa tur caminda durante e presentacion.

  E mensahe aki ta enfoca riba turismo sostenibel, subrayando cu ta importante pa nos bishitantenan tuma responsabilidad pa cuida y respeta e ambiente di Aruba mescos cu nan ta cuida nan cas y pais.