ATA a bay gradici alumnonan di Colegio EPI cu a yuda den ‘Autentico’

ORANJESTAD (AAN): E actividad culinario fenomenal teni recien, esta ‘Autentico Aruba Culinary Festival’

tabata di berdad un celebracion di e diversificacion di gastronomia local cu a tuma lugar di e siman di 7 te cu 12 di October cu a pasa.

   Y e evento principal teni pa dos anochi den cayanan di Oranjestad, lo keda memoriza como un exito grandi, y hasta mencion di esaki a aparece den edicion online di Forbes Magazine na Merca.

   Aruba Tourism Authority cu tabata e motor tras di e evento di ‘Autentico’, a dicidi siman pasa pa acudi cu monton di regalo cu cos di come y bebe rumbo pa Collegezaal di Colegio EPI pa bay celebra e gran exito, y duna honor na e studiantenan di Aña 3 di e opleiding LTH, Unit H&T, cu a yuda ATA durante e evento di Autentico.

   Sanju Luidens como tambe Tita Iglesias tabata presente pa duna splicacion riba e gran exito di Autentico, y a ofrece cos di come y bebe na e studiantenan cu sigur a sinti nan mes honra, y alavez orguyoso di por a sostene y yuda e actividad aki cu a haya un acogida internacional tambe.